Serokê Herêma Kurdistanê Nêçîrvan Barzanî di daxûyaniya xwe ya ji bo pîrozkirina Cejna Remezanê de daxwaz ji her du partiyên sereke Partiya Demokrata Kurdistanê (PDK) û Yekîtiya Nîştimanî ya Kurdistanê (YNK) kir ku ji bo berjewendiya gel û welat nakokiyên xwe bidine aliyekî.

Îro Yekşemê 1ê Gulana 2022an Serokê Herêma Kurdistanê Nêçîrvan Barzanî di daxûyaniyekê de Cejna Remezanê pîroz kir û behsa rewşa Herêma Kurdistanê û Iraqê kir û got, "Cejna Remezanê di demekê wisa de hat ku rewşa Iraq û Herêma Kurdistanê pêwîstî bi wateyên cejnê yên wek lêborîn, aştî, bixwedeçûn û lihevkirinê heye."

Nêçîrvan Barzanî li ser pirsgirêkên aliyên siyasî yên Herêma Kurdistanê got, “Ez ji Partî û Yekîtiyê wek her du hêzên sereke û ji hemû aliyên Kurdistanî dixwazim ku cejnê bikin derfetek û li ser esasê berjewendiya bilind a gel û welat bin, her pirsgirêk û nakokiyên xwe bidin aliyekî û xwe ji êrîşên medyayî û hevşikandinê biparêzin.”