Hevserokê HDPê Sizay Temelî piştî beşdariyê di piroseya dengdanê de, ji nûçegihanê K24ê re ragihand, ku heger bi piroseya dengdanê neyê lîstin, ewê rêjeya ji sedî 10 derbas bikin û di hilbijartinan de biserkevin.

Sizay Temelî got: Ez ji hemû xelkê Tirkiyê dixwazim ku bêne ser sindoqan û deng bidin, daku pêşerojeke baş ji zarokên xwe re misoger bikin, giringtirîn tişt çûna ser sindoqan e, pêdeçûnê ji dengê xwe re bikin û xwedî li dengê xwe derkevin".

Got jî: "Ez ji bo azadiya Selahedîn Demîrtaş û Fîgen Yuksekdag û hemû hêjayên din ku di zindanê de ne, deng didim, em dixwazin pirekê di nav hemû xelkên Tirkiyê de ava bikin".

Piroseya hilbijartinên Serokatî û Perlemana Tirkiyê îro demjimêr 8ê sibehê bi dema Hewlêr û Enqerê destipê kir û heya demjimêr 5ê êvarî berdewam dibe.

Li seranserî Tirkiyê, nêzîkî 60 milyon kes mafê wan yê dengdanê heye û ji bo wergirtina postê serokkomar 6 berbijar hevrikiyê dikin û li ser 600 kursiyên Perlemanê jî, du hevpeymanî û sê partiyên siyasî di nava hevrikiyê de ne.

K24