Ajansên nûçeyan yên Erebî, ji ser zimanê jêderên pizîşkî li nexweşxaneya navendî ya bajarê Himsê ragihandin, ku di encama bordûmana firokeyên Israîlî de, li ser firîngeha serbazî ya Deb`a li gundewarê rojavayê Himsê, 21 serbaz hatin kuştin û di nav wan de, 9 serbazên Îranî hene.

Heman jêderan diyar kirin, ku firokeyên cengî yên Israîlî, Pêncşemê bi şevê, êrîşî embarên çekan û ketîbeya berevaniya ezmanî li nav wê firîngehê kirin, ku çekdarên Hizbullahê û milîsên Îranî mezintirîn bingeha serbazî têde ava kirine.

Li gorî jêderên xwecihî, bi awayekî heftane, firokeyên Îranî yên barkirî bi keresteyên serbazî û xwarinê, li firîngeha serbazî ya Deb`a dadikevin.

Derbarê wê êrîşê, heya niha Hikûmeta Israîlî ti daxuyaniyek nedaye, lê di dema dawî de, êrîşên Israîlî li dijî hêz û milîsên Îranî li nav axa Sûryê zêde bûne, di roja 10ê vê mehê de jî, artêşa Israîlî bi mûşekan, êrîşî embarên çekan û navendeke radarê û hin bingehên serbazî yên hêzên rêjîma Sûryê li derdora Şamê kir û li devera Qisêr jî, artêşa Israîlê êrîşî bingehên Hizbulaha Lubnanî kir.

K24