Li navçeya Hezexê ya ser bi parêzgeha Şirnexê ya Bakurê Kurdistanê  ve wesayeteke zirxî ya leşkerî li zarokekê da û di encam de wî zarokî canê xwe ji dest da.

Li gor agahiyan îro 3ê Îlona 2021ê  di demjimêrên êvarî de, wesayetekî zirxî ya leşkerî ya Artêşa Tirkiyê, li taxa Turgutozal a ser bi navçeya Hezêxê ya  Şirnexê ve, li zarokê bi navê Mihraç Miroglu yê temen 7 salî da.

Piştî bûyerê kesûkarên wî Mihraç Miroglu bo Nexweşxaneya Dewletê ya Hezexê veguhastin, lê tevî hemû hewldanan nehat rizgarkirin û Miroglu li nexweşxaneyê canê xwe ji dest da.

Li gor zanyariyan dema ew zarok li ser bîsîkletê xwe wesayîta zirxî li wî da û herwiha piştî bûyerê beşeke zêde ya xelkê û kesûkarên wî zarokî, ligel rêxistina partiya HDPê ya wê navçeyê  ber bi nexweşxaneyê ve çûne.

Li aliyê din Partiya Demokratîk a Gelan (HDP) derbarê bûyerê de li ser hesaba xwe ya Twiterê daxuyaniyek belav kir û ew bûyer weke “qetlîam” bi nav kir.

HDP di daxuyaniya xwe de dibêje, “Îro li navçeya Hezexê zarokê 7 salî yê bi navê Mihraç Miroglu, ku weseyata zirxî li wî dabû, hate qetilkirin. Ew bûyerên trafîkê yên ku bi wesayetên leşkerî, li bajarên Kurdan pêk tên û di encam de dibin sedema mirinan, ne bûyerên trafîkê ne, komkujî ne. Ev bû komkujiya çendan ya zarok, jin û kalan? Êdî bes e!”

 

Rudaw