Dozgeriya giştî ya di dadgeha berevaniya gel de li bakurê Sûryê, di daxuyanyekî de ragihandiye, ku piştî giliyên xelkê Efrînê li dijî endamên Encûmena Niştimanî ya Kurd li Sûryê (ENKS) û li dijî Partiya Yekîtiya Kurd li Sûryê (YEKÎTÎ), wan biryara girtina her yek ji Sikirtêrê Partiya Yekîtî û endamê komîta pêwendiyên derve ya ENKS Ibrahîm Biro û endamê polîtbîroya YEKÎTÎ û endamê serkirdatiya Hevpeymanya opozisyona Sûryê Fûad Elîko daye.

Di wê daxuyaniyê, herdu serkirdeyên partiya YEKÎTÎ û ENKSê, hatine tometbarkirin ku destên wan di êrîşa li ser Efrînê de hebû û wan piştevaniya dagîrkirina Efrînê kiriye, ji ber vê yekê jî wan biryara girtina herdu serkirdeyên ENKS daye.

Ji aliyê xwe ve, herdu serkirdeyên ENKSê wan tometan red dikin û dibêjin ku biryarên rêveberiya xweser nerewa ne û tometên wan bê bingehin.

Berî niha jî Encûmena Niştimanî Kurdî li Sûryê (ENKS) derbarê wan tometan, daxuyaniyek belav kir û têde tometên li dijî her yek ji Ibrahîm Biro û Fûad Elîko red kir.

Nakokiyên di navbera rêveberiya xweser û ENKSê de, vedegerin berî operasyona artêşa Tirkiyê li Efrînê, di roja 13 Tebaxa 2016an de, asayişa li Rojavayê Kurdistanê, serokê wê demê yê ENKSê Ibrahîm Biro desteser kir û piştre ew sirgûnî Herêma Kurdistanê kir. Biro wê demê ji medya Kurdî re got: "Piştî girtina min li Qamişlo, du kesan yek ji wan riwê xwe nixumandibû, min bi otombêlekê anîn ser sînorê Herêma Kurdistanê û gotin: Tu ne hêja ye li vî welatî bijî, heger tu careke din vegere, emê te bikujin û qet qetî bikin".

K24