Elî Qazî yê kurê Pêşeng Qazî Mihemedê damezrênerê Komara Kurdistanê, di cvîneke çapemeniyê de piştevaniya xwe ji bo giştpirsiya Başûrê Kurdistanê ragihand. Elî Qazî bang li hemû partiyên Kurdistanê kir, ku roja 25ê Îlonê bi hev re herin ser sindoqan û daxwaza azaî û serxwebûnê bikin.

Elî Qazî duh Çarşemê (09-08-2017), di civîneke çapemeniyê de ji gelê Kurdistanê xwest beşdarî giştpirsiyê bibin û dengê “erê” bidin serxwebûnê.

Di daxuyaniya xwe de Elî Qazî destnîşan kir, ku Kurdistan ji hemû deman zêdetir ji qonaxeke hestiyar û dîrokî re derbas dibe û ji hemû deman zêdetir pêwîstiya kurdan bi yekrêzî û hevgirtinê heye.

Elî Qazî got: “Pêşmergeyên Kurdistanê bûne parêzvanên azadî û mafên gelên cîhanê li beramber terorîzma cîhanî ya DAIŞê, lewma pêgeha Kurdistanê li ser asta navdewletî bûye emrekî defakto û herêm jî ber bi guhertineke bilez ve diçe. Weke gelê kurd em jî ji bo gihiştina serxwebûn û armancên xwe yên neteweyî, divê sûdê ji derfetên navxweyî û navdewletî werbigrin û yekgirtî bin.”

Kurê Qazî Mihemed diyar kir, ku xebat û mafê biryardana ser paşerojeke geş û gihiştina serxwbeûnê armanca sereke ya gelê kurd e û wiha berdewam kir:

“Gelê me piştî 70 salên xebatê, careke din bi rêya giştpirsiyê biryara çarenivîsa xwe dide. Lewma pêwîste em hemû, li dûrê hizirkirina teng a hizbî, bi stratejiyeke nîştîmanî û yekgirtî hizra ewlekariya nîştîmanî û berjewendiyên xwe yên bilind bikin. Wate, giştpirsiya serxwbûnê ne ji bo ti kes û aliyekê ye. herwiha ne mûzayedeya kesekî yan jî aliyekê li dijî aliyeke din nîne. Derfetekî dîrokî ye û divê wenda nekin.”

Siyasetmedarê kurd herwiha got: “Serxwbûn encama xwîna pak a sedan hezar zarokên şehîdên her çar parçeyên Kurdistanê ye. Serxwebûn hêvî û deriyê qonaxeke nû ya xebatê ye ji bo parçeyên din ên Kurdistanê. Di vê rêçê de kurd dibin sedema seqamgîrî û aşitiya navçeyê, ji bo parastina berjewendiyên hevbeş ên welatên cîran û dabînkirina ewlekariya navdewletî xebat dikin.”

Elî Qazî amaje bi wê yekê kir, ku kurd dixwazin bi şeref, serbilind û bi rûmet bijîn û daxuyaniya xwe wiha bidawî kir:

“Kurd dixwazin bi şeref û keramet bijîn. Dixwazin ji bo ciwanên niha û nifşên paşerojê bihareke geş diyar bikin. Ti armanceke kurdan li dijî ti aliyek an jî welatekî nîne. Lewma ji bo serxwebûna Kurdistanê, kurd, tirkmen, kildan û siryan em tev de roja 25-09-2017ê, bi hestekî neteweyî ve piştevaniya pêvajoya giştpirsiyê bikin, li hember gefan bi hevgirtinê biryara çarenivîsa xwe bidin. Ji ber ku piştgiriya giştpirsiyê erkekî olî û neteweyî ye.”

Rudaw