Hevserokê HDPê Selahattin Demirtaş bi rêya telefonê peywednî bi Serokê Giştî yê CHPê Kemal Kiliçdaroglu kir û êrişa çekdarî ya bo ser karwana wî şermezar kir.

Partiya Demokratîk a Gelan (HDP) êrişa îro ya bo ser karwana Serokê Giştî yê Partiya Komarî ya Gel (CHP) şermezar kir.

Li gorî zanyariyên, her yek ji hevserokên HDPê Selahattin Demirtaş û Fîgen Yuksekdag bi rêya telefonê pêwendî bi Serokê Giştî yê CHPê Kemal Kiliçdaroglu kirin û êrişa li dijî karwana CHPê li parzêgeha Artvîn a Tirkiyê şermezar kirin/

Demirtaş û Yuksekdag herwiha dilgiraniya xwe li hember wê êrişê anîne ziman û ji Kiliçdaroglu re hêviya tendirustiyê kirine.

Herwiha Navenda Ragihandina HDPê jî derbarê bûyerê de daxuyaniyek de û êrişa li dijî karwana CHPê û Kemal Kiliçdaroglu protesto kir.

Îro piştî nîvro çend çekdarên nenaskirî li ser rêya sereke ya bajarê artvîn li bakurê rojhilata Tirkiyê kemîn ji karwana otomobîlên CHPê û Serokê wê partiyê Kemal Kiliçdaroglu re danîn û bi çekan êrişî ser karwanê kirin.

Di encamê de pevçûnek dijwar di navbera çekdarên û zêrevanên Kiliçdaroglu de derket û zêrevanan karîn Kiliçdaroglu rizgar bikin û ber bi navçeya Şafşat derbas bikin.

Di encama êrişê de polîsekî Tirkiyê hat kuştin.

Rudaw