ENKSê derbasbûna Artêşa Tirk şermezar kir
Li ser derbasbûna leşkerên Tirk ji bo nava axa Rojavayê Kurdistanê ENKS daxuyaniyek belav kir û ragihand, kiryara Artêşa Tirkiyê jiyana xelkê dixe xetere û dibe sedema ku welatî ji cihê xwe koç bikin.
ENKS ew karê Artêşa Tirk şermezar kir û ragihand ku divê hikûmeta Tirkiyê gavên berbiçav ji bo çareskirina pirsa kurd bavêje û bi partiyên kurdî re bikeve diyalogê.
Emîndariya Giştî ya ENKS herwiha bang li PKKê jî kir giraniya xebata xwe bide ser aştiyê û projeya ku Abdullah Ocalan dest pê kiriye û ji çareseriya leşkerî û tundrewiyê bi dûrkeve.
Encumena kurdî ji hikûmeta Tirkiyê û PKK xwest şerê li nava bajaran rawestînin û ji bo bidestxistina mafê gelê Kurdistanê li Bakurê Kurdistana di zûtirîn dem de derbasî diyalogê bibin.
Herwiha xwest ku Artêşa Tirkiyê hêza xwe ji gundên Semisax û Letîfoyê li ser sînorê Qamişlo û Rimêlanê vekişîne.
Rudaw
