Cîgirê fermandarê giştî yê Artêşa Azad a Sûriyê Malik El-Kurdî ragihand ku ew li dijî wê yekê ne ku grûbên çekdarî derbasî navçeyên kurdan li Sûriyê bibin.

Malik El-kurdî ji Rûdawê re ragihand: “Her destêwerdaneke di nav navçeyan kurdan de dê bibe sedema derketina şerê di navbera kurd û ereban de.”

El-kurdî diyar kir ku gelek bشelge di destê wan de hene ku kê navçe xistiye nava krîzê de û dê di dema guncayî de wan belgeyan aşkere bikin.

Cîgirê fermandarê giştî yê Artêşa Azad her wiha got: “Ew karên Cebhet El-Nursa ku li navçeyên derdora bajarokê Girê Spî dike, şermezar dikin ji ber ew şer dikeve xizmeta rêjîmê.”

Malik El-kurdî welatên rojava tometbar kir ku rê li ber derbasbûna Cebhet El-Nursa û grûba bi navê `Dewleta Îslamî li Iraq û Şamê` di nava xaka Sûriyê de xweş kirine daku temenê rejîma Beşar Esed dirêj bikin.

El-kurdî tekez kir ku ew wek Artêşa Azad li dijî Cebhet El-Nursa û grûbên din yên radîkalin û dibînin ku ew grûb di berjewendiya rejîmê de tev digerin.

El-Kurdî, Partiya Yekîtiya Demokrat (PYD) jî tometbar kir ku alîgirê rêjîmê ye.

Cîgirê fermandarê giştî yê Artêşa Azad Malik el-Kurdî destnîşan kir ku pilaneke navdewletî heye ku Sûriyê bikeve nava milmilaneyên navxweyî daku parçe bibe.

El-kurdî di dawiya daxuyaniya xwe de eşkere kir ku dema Artêşa Azad li Hims û Şamê şer dike, tu alîkariyên leşkerî nagihinê, lê berevajî dema grûbeke ji bo şer diçe navçeyan kurdan, alîkariyên çekdarî ji welatên herêmî û ewropî bi ser de diherikin.

Rudaw