Cîgirê Serokwezîrê Herêma Kurdistanê Îmad Ehmed ragehand ku daxwaz kirine hilbijartin di dema xwe de bên kirin û got: ‘’Niha em li benda bersiva Komisyona Bilind a Hibijartina ne.’’ Herwiha eşkere kir ku sibe şandeke bilind bi serokatiya Barzanî serdana Bexdayê dike û hewil dide pirsgirêkan çareser bike.

Di merasîma danîna temelê avahiya Fermangeha Jîngeha Silêmaniyê de, Cîgirê Serokwezîr axaftinek kir û got: ‘’Me wek hukûmetê daxwaz ji Komisyona Bilind a Hilbijartinan kiriye daku hilbijartina parêzgehan di dema xwe de bê kirin û niha em li benda bersiva wan in.’’

Ehmed eşkere kir ku li roja yekşembî şandeke bilind bi serokatiya Serokê Herêma Kurdistanê Mesûd Barzanî, hejmarek wezîr û nûnerên aliyên siyasî serdana Bexdayê dike û ligel berpirsên bilind ên Bexdayê hewil dide pirsgirêkan çareser bike.

Îmad Ehmed wiha axifî: ‘’Ji bo çareserkirina pirsgirêkan 6 komîte hatine pêkanîn û em dê ligel berpirsên bilind ên Bexdayê gotûbêjê bikin û hewil bidin pirsgirêkan çareser bikin.’’

Derbarê çareserkirina kirîza benzînê de jî Ehmed got: ‘’Niha me çend benzînxane bo vê mebestê çêkirine, lê ji ber hejmara otomobîlan gelekî zêdeye heta niha bi tevahî ew pirsgirêk nehatiye çareserkirin.’’