لە دیدارەکەدا، گفتوگۆیەکی چڕ لەبارەی بارودۆخی گشتیی ناوچەکە و گرنگیی چەسپاندنی کولتووری لێبوردەیی و پێکەوەژیانی ئایینی و نەتەوەیی کرا. سەرۆک بارزانی وێڕای دەربڕینی خۆشحاڵی خۆی بۆ ئەم دیدارە، تیشکی خستە سەر پێگەی هەرێمی کوردستان وەک پەناگەیەکی ئارام و نموونەیەکی پێشەنگ لە ناوچەکەدا بۆ حەواندنەوە و پاراستنی مافی تەواوی پێکهاتەکان، بەتایبەتی مەسیحییەکان.

لای خۆیەوە، پاپای ڤاتیکان ستایشی ڕۆڵی مێژوویی سەرۆک بارزانی و گەلی کوردستانی کرد لە ڕووبەڕووبوونەوەی توندڕەوی و پاراستنی پێکەوەژیانی ئاشتییانە. هەروەها سوپاسی هەرێمی کوردستانی کرد بۆ میوانداریکردن و پاراستنی ئاوارە و لێقەوماوان لە کاتە سەختەکاندا، و جەختی لەوە کردەوە کە کوردستان هەمیشە وەک مەڵبەندی ئاشتی دەمێنێتەوە.

ئەم دیدارە لە کاتێکدایە کە هەردوولا جەختیان لە پێویستیی کۆتاییهێنان بە شەڕ و ئاڵۆزییەکانی ناوچەکە و پەیڕەوکردنی زمانی دیالۆگ بۆ چارەسەرکردنی کێشەکان کردەوە، بە جۆرێک کە مافی تەواوی گەلان و پێکهاتەکان پارێزراو بێت.