دەقێک بۆ بیرکردنەوە لە واتای ڕاستەقینەی سەرساڵ
هەموو ساڵێک لەم کاتەدا، خەڵکی سەرقاڵی پلاندانانی سەرساڵ دەبن. پرسیار دەکرێت لە کوێ سەرساڵ دەکەیتەوە؟بۆ کام وڵات دەچیت؟چ ئاهەنگێکی گەورەت پێکهێناوە؟وەک ئەوەی گرنگترین بڕیاری ژیانمان ئەوە بێت کە لە کام شوێنێک تەماشای ئاگربازی بکەین یان لە کام ڕێستۆرانتێک نانی ئێوارە بخۆین.بەڵام ڕاستی ئەوەیە کە گرنگ نییە سەرساڵ لە چ وڵاتێک بوویت، یان بۆ کام وڵاتێک دەڕۆیت تا ئاهەنگی سەرساڵ بگێڕیت. ئەوەی ڕاستەقینە گرنگە تێپەڕبوونی یەک ساڵی تر لەسەر تەمەنتە چی بوو لەسەر جەستەت، لەسەر ڕوحت، لەسەر بیرکردنەوەت، لەسەر کەسایەتیت.
ساڵێک تەنها ژمارەیەک نییە.!سارد و گەرمی ژیان، خۆشی و ناخۆشی، سەرکەوتن و شکست، هەموویان بەشێکن لە گەشتی گەشەکردن. هەر ساڵێک مامۆستایەکی بێ وێنەیە، ئەگەر ئامادە بین و لێی فێربین. کێشەکان بریندارمان دەکەن، بەڵام بەهێزمان دەکەن. شکستەکان ئازارمان پێدەدەن، بەڵام دانایی پێشکەش دەکەن.کاتێک ساڵێک تەواو دەبێت، ئەم پرسیارانەن کە پێویستە لە خۆمان بکەین هەموومان ..
چیم بەدەستهێنا کە نابینرێت بەڵام هەستی پێدەکرێت؟ چی فێربوویم کە بیرکردنەوەی منی گۆڕی؟ چۆن گۆڕام وەک مرۆڤێک؟ ئایا دڵسۆزتر بووم؟ ئایا بە ئاگاتر بووم؟ ئایا پەیوەندییەکانم قووڵتر بوونەوە؟پڕۆگرامی ساڵی نوێ لە دەرەوە بۆ ناوەوەیە پڕۆگرامی ساڵی نوێت نابێت لیستێک بێت لە شوێنە توریستییەکان، هۆتێلە گرانبەهاکان، یان ئاهەنگە دەنگ و ڕەنگینەکان. ئەوانە شتی خۆشن، بەڵام تەنها بۆ چەند کاتژمێرێک یان چەند ڕۆژێک. ئەوەی دەمێنێتەوە ئەوەیە کە لە ناوەوەت دروستی دەکەیت.پڕۆگرامی ڕاستەقینەی ساڵی نوێ ئەوەیە کە فێری شتێکی نوێ ببیت کە دڵت پێوە دەسووتێت زمانێک، هونەرێک، لێهاتوویەک. نەک بۆ نوواندن، بەڵکو بۆ گەشەکردن.کتێب بخوێنیتەوە کە بیرکردنەوەت فراوان دەکات و دەروازەیەکی نوێ دەکاتەوە بۆ تێگەیشتن لە خۆت و جیهان.خووی خراپێک دەستکاری بکەیت کە بەربەستی پێشکەوتنتە کەمتەرخەمی، دواخستن، ترس لە شکست.
گفتوگۆ بکەیت لەگەڵ کەسانێک کە جیاوازن لە تۆ، گوێبگریت بە ڕاستی، فێر ببیت لە ڕوانگەی تر.ئاگاداری تەندروستیت بیت هەم جەستەیی و هەم دەروونی. چونکە جەستەیەکی تەندروست ڕوحێکی تەندروستە.با فێری ئەوە بین کە ساڵەکانمان بە خۆگەشەکردن و زانیاری جیاواز و ئەزموونی واتاداری پڕ بکەینەوە، نەک تەنها بە مۆبایل و سۆشیال میدیا و شوێنی سەرساڵکردنەوە.ساڵێکی باش ئەوە نییە کە بێ ئازار یان بێ کێشە بێت. ساڵێکی باش ئەوەیە کە تۆی گەورەتر بکات، دانایانەتر بکات، مرۆڤانەتر بکات.نرخی ساڵێک نییە بە چەند وێنەیەکت گرتووە لە شوێنە جوانەکان، بەڵکو بەوەی چەند جار گۆڕایت بۆ مرۆڤێکی باشتر. نییە بە چەند سەفەرێکت کردووە، بەڵکو بەوەی چەند کەسێک کاریگەریت لەسەر کردووە بە چاکە. نییە بە چەند پارەیەکت خەرج کردووە، بەڵکو بەوەی چەند شتێکی بەنرخت فێربووە کە پارە ناتوانێت بیکڕێت.واتای ڕاستەقینەی سەرساڵ ئەوە نییە کە لە کوێ بیت، بەڵکو ئەوەیە کە کێ بیت. ئەوەیە کە سەیری دواوە بکەیت بە ڕێزەوە و سپاسەوە بۆ هەموو ئەوەی فێرت بووە، و سەیری پێشەوە بکەیت بە ئومێدێکی دانایانە و پلانێکی ڕوون بۆ گەشەکردنی زیاتر.نەک لە هۆتێلێکی پێنج ئەستێرە، بەڵکو لە دڵی خۆتدا. نەک لە ناو قەڵەباڵیخی ئاهەنگێکی گەورە، بەڵکو لە ئارامی بیرکردنەوەیەکی قووڵ.ئەمساڵ، پێش ئەوەی پرسیار لە خۆت بکەیت لە کوێ سەرساڵ دەکەمەوە؟پرسیار لە خۆت بکە چۆن دەتوانم ئەم ساڵە بکەمە ساڵێک کە ڕاستەقینە گۆراوم بکات؟چونکە لەکۆتاییدا، ئەوە نییە چەند ساڵێک ژیاویت، بەڵکو ئەوەیە چۆن ژیاویت لەو ساڵانەدا.
سەرساڵێکی پڕ لە واتا و گەشە بۆ هەموومان.