ئەمڕۆ چوارشەممە 17-12-2025 شازدەیەمین ساڵوەگەڕی ڕۆژی ئاڵای کوردستان بوو، لە ساڵی ٢٠٠٩ پەرلەمانی هەرێمی کوردستان ئەم ڕۆژەی وەک ڕۆژێکی فەرمی پەسەند کرد،  کە لە هەموو شار و شارۆچكە و دەڤەرەكانی هەرێمی كوردستان بە سۆز و خۆشەویستی و نیشتمانپەروەرییەوە یاد دەکرێتەوە. با بزانین بۆچی چوار ڕەنگە و لە چییەوە هاتووە:

 ڕەنگی سوور: هێمایە بۆ  قوربانی  و خوێنی باوک و باپیران و شۆڕشگێڕان کە لەپێناو سەربەرزی و ئازادیدا ڕژاوە.

ڕەنگی سپی: پەیامی ئاشتی و پێکەوەژیانی هەموو ئایین و ئایینزا و پێكهاتە نەتەوەییەكانی كوردستانە.

خۆرەكە لە ناوەڕاستی ئاڵاکەدایە:  بە بیست و یەک تیشکەکەیەوە دەدرەوشێتەوە، ئاماژەیە بۆ ڕووناکی و هیوا و ئومێدی نەتەوەی كورد، کە سازش  لەسەر مافە نەگۆڕەکان قبوڵ ناکات.

ڕەنگی سەوز: بەڵگە و هێمای ژیانی نوێبووەوە و ئاوەدانییە، كە بەردەوام خۆزگە و خەبات ئاوێتەی هێنانەدیی ئامانج و بووژانەوەی نیشتمانە.   

(21) تیشک؟ ئەم  ژمارەیە پیرۆزییەکی تایبەتی هەیە، ڕۆژی ٢١ی ئازار كە ڕۆژی نەورۆزە، سەرەتای هاتنی وەرزی بەهار و بووژانەوە و تەقینەوەی كانی و كارێزو جۆگەلەكانە، ڕۆژی سەرکەوتنی ئیرادەیە بەسەر ستەمدا، هەر ئەو ژمارەیە لەلای هەندێك لە کوردانی ئێزیدیش هێمایە و پیرۆزیی خۆی هەیە.

ئا/ بەهادین جەلال مستەفا