بڕیارە سبەی دووشەممە چوار وەزیری حکوومەتی ھەرێمی کوردستان بڕۆنە پەرلەمانی کوردستان و لەگەڵ هەردوو لیژنەی ئەوقاف و کاروباری ئایینی لیژنەی کاروباری شەھیدان و جینۆساید و زیندانیانی سیاسیی کۆ دەبنەوە.

لەمبارەوە سەعید وەیسی بڕیاردەری لیژنەی ئەوقاف و کاروباری ئایینی لە پەرلەمانی کوردستان رایگەیاند: "سبەی دووشەممە ٧ی١٢ی٢٠٢٠ لە پەرلەمانی كوردستان ھەر یەکە لە وەزیرانی خوێندنی باڵا و توێژینەوەی زانستی، پەروەدە، ئەوقاف و كاروباری ئایینی لە حکوومەتی هەرێمی کوردستان، سەردانی پەرلەمان دەکەن و لەگەڵ لیژنەکەمان گفتوگۆ لەبارەی کێشەی قوتابخانە و پەیمانگەکانی بەشی خوێندنی ئیسلامی دەکەن".

ئەو پەرلەمانتارە ئاماژەی بەوەش کرد: "ئەو کۆبوونەوەیە بەدڵنیاییەوە دەرەنجامی باش و بایەخداری بۆ زیاتر بەرەوپێشبردنی خوێندنی ئیسلامی لە ھەرێمی كوردستان و چارەسەركردنی كێشەی مامۆستایانی ئایینی دەبێت".

بڕیاریشە سبەی وەزیری کاروباری شەھیدان و ئەنفالکراوان بچێتە پەرلەمانی کوردستان و لەگەڵ لیژنەی شەھیدان گفتوگۆ لەبارەی چەند پرسێکی تایبەت بە کێشەی کەسوکاری شەھیدان و ماف ئیمتیازاتیان گفتوگۆ بکەن.











باسنیوز