ئەندامێکی ئەنجوومەنی پارێزگای سلێمانی ڕای گەیاند، وێڕای بوونی بڕیاری وەزارەتی ناوخۆ بۆ قەدەغەی بەکارھێنانی ئامێری ئاشکراکردنی شوێنی کامێراکانی چاودێری خێرایی ئۆتۆمبێل، بەڵام تا ئێستا ئەو دیاردەیە بەردەوامە و کۆنتڕۆڵ نەکراوە.

بەرزان محەمەد، سەرۆکی لیژنەی ناوخۆ لە ئەنجوومەنی پارێزگای سلێمانی ڕایگەیاند: "کامێراکانی چاودێریی خێرایی ئۆتۆمبێل لەلایەن حکوومەتی ھەرێمی کوردستانەوە بودجە بۆ کڕینیان تەرخان کراوە و لە شەقامەکان دانراون بۆ ئەوەی سەلامەتیی شوفێران و ھاووڵاتییان بپارێزن".

گوتیشی: "بەڵام ئەوەی مایەی نیگەرانییە ماوەیەکە ئامێری ئاشکراکردنی شوێنی ئەو کامێرایانە مامەڵەی کڕین و فرۆشتنیان پێوە دەکرێت و شوفێران بەکاری دەھێنن و ئەوەش لە گرنگی بوونی کامێراکانی کەم کردووەتەوە و ئەگەر کۆنتڕۆڵ نەکرێت، دووبارە ڕووداوەکانی ھاتوچۆ دەگەنەوە ئاستی مەترسیدار".

بەرزان محەمەد باسی لەوەش کرد: "ھەرچەندە وەزارەتی ناوخۆی حکوومەتی ھەرێمی کوردستان بڕیاری قەدەغەکردنی مامەڵەکردن و بەکارھێنانی ئەو ئامێرەی داوە، بەڵام بەداخەوە لە سنووری پارێزگای سلێمانی وەک پێویست جێبەجێ نەکراوە و شوفێران بەردەوامن لە کڕینی و بەکارھێنانی، بۆ ئەو مەبەستە بەنیازین لەگەڵ ھاتوچۆی سلێمانی گفتوگۆ بکەین و بەیەکەوە بەرنامەی ھۆشیاری و بەکارنەھێنان و قەدەغەکردنی ئامێرەکە دابنێین".










باسنیوز