ئەمڕۆ سێشەممە لەبارەی دۆسیەی زێدەڕۆیی سەر زەویی پێکهاتەی مەسیحی لە گوندی "کێشکاوە"ی سەر بە قەزای ئاکرێ، نوێنەری پێکهاتەی مەسیحییەکان (كلد و ئاشووری و سریان) یاداشتێکی دایە پەرلەمانی کوردستان.

ئەمڕۆ سێشەممە ٢٤ی١١ی٢٠٢٠ لە پرێس کۆنفرانسێکدا ڕۆمیۆ هەکاری پەرلەمانتار لە فراكسیۆنی هاوپه‌یمانیی یه‌كێتیی نه‌ته‌وه‌یی لە پەرلەمانی کوردستان گوتی: "ئێمە بەپێی یاسای ڕێگری لە زێدەڕۆیی و یاسای گۆڕینی دیمۆگرافیا، داوامان لە پەرلەمانی کوردستان کردووە زێدەڕۆیی بۆ سەر زەویوزاری پێکهاتەکان لە گوندی کێشکاوە ڕابگیرێت، چونکە ئەوە پێشێلکاریی مافی پێکهاتەکانە".

هاوکات باسی لەوەش کرد: "ئەوان داوا لە سەرۆکی حکوومەتی هەرێمی کوردستان دەکەن لە زێدەڕۆیی بیانپارێزێت، چونکە ئەوە گۆڕینی دێموگرافیایە".

بەپێی قسەکانی ئەو پەرلەمانتارە کەرتی گوندی کێشکاوە 22 پارچە زەویی کشتوکاڵییە و 120یان تاپۆن و ئەوانی تریش گرێبەستی کشتوکاڵین و بەگشتی زیاتر لە دوو هەزار دۆنمە".

ئەو پەرلەمانتارە باسی لەوەش کرد کە داوا لە پەرلەمان و حکومەتی هەرێمی کوردستان دەکەن بەپێی یاسا مافەکانیان بۆ بگێڕدرێتەوە.

گوندی کێشکاوە، دەکەوێتە سنووری قەزای ئاکرێ و لەلایەن خەڵکی نزیکی گوندەکەوە زەوییەکانی ئەو گوندە دەستیان بەسەردا گیراوە.












باسنيوز