بەشێ چارەسەریا فیزیكی بۆ زارۆكێن نەخۆش ل دهۆكێ هاتە ڤەكرن
د. نزار عسمەت، رێڤەبەرێ گشتی یا ساخلەمیا پارێزگەها دهۆكێ دپرێس كونفرانسەكێدا دیاركر كو: "رێكخراوا ئایسپۆ یا ئیتالیی رابوویە ب نوژەنكرن ودروستكرنا بەشێ چارەسەریا فیزیكی ل سەنتەرێ نەخۆشین پەلكەفتیان ل دهۆكێ. ئەڤە بەشێ شێوەیەكێ نوو هاتیە دروستكرن دێ خزمەتەكا مەزن پێشكێشی زارۆكان كەت. كوژمێ دوو سەد هزار یورو لێ چێكرنا پرۆژەیێ یێن هاتینە مەزاختن. هەموو كەرەستێن پێدڤی دڤان سەنتەرێ دا بۆ خزمەتكرنا زارۆكان هاتینە دابینكرن".
د. نزار، گۆت: "رێكخراوا ئایسپۆ رابوویە ب دابینكرنا بەشێ چارەسەریا فیزیكی ب راهێنانێن نێڤدەولەتی وهاریكاریا هونەری وهاریكاریا تەكنیكی یا پێشكەفتی بۆ زارۆكێن خودان پێدڤیێن تایبەت یێن هەمە جۆر ویاریك و كەل وپەلێن نافخۆیی هەروەسا ژی كارێ نوژەنكرنێ ژی ئەنجامدایە بۆ باشتركرنا خزمەتێن دەستنیشانكری وچارەسەكرنێ یێن زوو. ئەڤ كارا ب هەماهەنگی دگەل نەخۆشخانا هیڤی یا زارۆكان دهێتە ئەنجامدان.
ماجد سەید سالح، جێگرێ پارێزگارێ دهۆكێ دپرێس كونفرانسێ دا دیار كر كو: "پێنگاڤێن باش هاتینە هاڤیتن بۆ پتر پێشخستنا سەنتەرێ چارەسەریا پەلكەفتیان ل دهۆكێ. ئەڤ سەنتەرا خزمەتا زارۆكێن دهۆكێ یێن دەشتا نەینەوا دكەت. ئەڤە جهێ دەستخۆشیێ یە ل ساخلەمیا دهۆكێ و رێكخراوا ئایسپۆ. ئەم باوەرن پێنگاڤێن باشتر درێكی دانە بۆ خزمەتكرنا نەخۆشان ل دهۆكێ".
ئاشكەرا كر كو: "نوژدار و كارمەندێن ساخلەمیێ دهەیڤێن بۆریدا خزمەتەكا مەزن بۆ پاراستنا ژیانا وەلاتیان كریە پێخەمەت پاراستنا ژیانا وەلاتیان ژ ڤایرۆسێ كۆرۆنایێ. ئەم هیڤدارین وەلاتی پتر هەڤكار بن بۆ كونترولكرنا نەخۆشیا كۆرۆنایێ".
باسنيوز
