ناوەندی ڕەوەندی كورد لە دەرەوە، لە ڕاگەیاندراوێكدا ئیدانەی هەڕەشەی پەكەكە بۆ دروستكردنی گرژی و ناتەبایی لە هەرێمی كوردستان دەكا و پاڵپشتیی خۆیان بە قەوارەی هەرێمی كوردستان دەربدەبڕن و داوا دەكەن پەكەكە واز لە دەستوەردان لە كاروباری هەرێمی كوردستان بهێنێ.

لە ڕاگەیاندراوێكدا، كە ناوەندی ڕەوەندی كورد لە دەرەوە، تیشكی خستە سەر هەڕەشەكانی ئەم دواییەی پەكەكە بۆ سەر هەرێمی كوردستان و ئاماژەی بەوە كردووە، ئەو جۆرە لێدوانانەی پەكەكە كە بە نەفەسی نانەوەی گرژی و ناتەبایی نیشتمانییە و جگە لە تێكدانی سەقامگیری هەرێمی كوردستان و دژایەتیی دەستكەوتە نیشتمانی و نەتەوەییەكانی گەلەكەمان، مەترسیشە بۆ سەر ژیان و گوزەرانی و بژێوی و بەرژەوەندییەكانی هەرێمی كوردستان، كاریگەری و دەركەوتەی نەرێنی لەناو نێوەندە نێودەوڵەتییەكاندا دەبێ.

لە بەشێكی ڕاگەیاندراوەكەدا، پاڵپشتیی خۆیان بۆ قەوارەی سیاسی هەرێمی كوردستان و دامەزراوە دەستووری و یاساییەکان و دەستكەوتە نیشتمانی و نەتەوەییەكانی دەردەبڕن، لە هەمان كاتدا سەركۆنەی هەر كردەوە و دەستدرێژییەك دەكەن كە "زیان بە بەرژەوەندییە نیشتمانییەكانمان بگەیەنێ."

داواش لە سەركردایەتیی پەكەكە دەكەن، "ڕەچاوی هەستیاریی بارودۆخی باشووری كوردستان و گوزەران و بژێویی خەڵكەكەی بكەن. بۆ ڕێگەگرتن لە زیاتر تێكچوونی بارودۆخەكە و ڕوونەدانی ڕووداوی نەخوازراوی تر، پێویستە واز لە دەستوەردانی كاروباری حكوومەتی هەرێمی كوردستان بهێنن و ڕوو لە مەیدانی ڕاستەقینەی چالاكییەكانییان بکەن كە باكووری كوردستانە".













باسنيوز