لیژنەی دارایی پەڕلەمانی عێراق ئاشكرای دەكات، دوای پەسندکردنی یاسای قەرز دوو مووچە دەدرێ. ڕاشی دەگەیەنێت، 320ملیار دیناری مووچەی فەرمانبەرانی کوردستانیش بەردەوام دەبێ.

د. ئەحمەد سەفار، بڕیاردەری لیژنەی دارایی پەڕلەمانی عێراق ، ڕاگەیاند:" ئەو بڕەی بۆ پڕكردنەوەی كورتهێنان لە پەڕلەمان دەنگی لەسەر دەدرێت لەچوارچێوەی یاسای قەرز لەنێوان 10 بۆ 15 تریلیۆن دینارە كە بۆ پڕكردنەوەی كورتهێنانی مانگانەیە، كە سێ ترلیۆن و نیوە بۆ هەر مانگێك".

ئاماژەی بەوەش دا، دوای پەسەندكردنی یاساكە، حكوومەت دەتوانێت مووچەی هەردوو مانگی 10 و 11 پێكەوە دابەش بكات. گوتیشی: "پشكی هەرێمی کوردستان 320 ملیار دیناری مانگانەیە و گەرەنتی كراوە تا ڕێككەوتنی نوێی نێوان هەولێر و بەغدا لەسەر یاسای بودجەی 2021 دەکرێ، گفتوگۆی باشیش لە نێوان هەردوولادا کراوە".

ئاشكراشی كرد، لە بودجەی 2021دا ڕێككەوتنی هەولێر و بەغدا كاری پێدەكرێت و تیایدا هەرێمی کوردستان 250 هەزار بەرمیل نەوتی ڕۆژانە و 50%ی داهاتی دەروازە گومرگییەكان دەداتە بەغدا و لە بەرامبەردا بەشە بوودجەیەك بۆ هەرێمی کوردستان دەنێردرێ.

جەختیشی کردەوە، یاسای قەرز كۆتایی ئەم هەفتەیە دەنگی لەسەر دەدرێت و بەهۆیەوە مووچەی فەرمانبەران و خانەنشینان و چاودێریی كۆمەڵایەتی و دەرمان و كۆبۆنی خۆراك و شایستە داراییەكانی جووتیاران گەرەنتی دەكرێن. گوتیشی: ”ڕاستەوخۆ دوای پەسەندكردنی یاسای قەرز، حكوومەتی عێراق دەست بە دابەشكردنی مووچەی فەرمانبەران دەكات“.








باسنيوز