به‌رێوه‌به‌ری گشتیی ده‌سته‌ی مافی مرۆڤ، ئاشكرای دەكا كە ئەو منداڵانەی‌ له‌لایه‌ن په‌كه‌كه‌وه‌ رفێنراون چارەنووسیان دیار نییە و ماڵباتەكانیان بۆ ئەو مەبەستە سكاڵایان گەیاندووەتە دەستەكەیان.

ئەمڕۆ یەكشەممە 8/11/2020، تاڤگه‌ عومه‌ر، به‌رێوه‌به‌ری گشتیی ده‌سته‌ی مافی مرۆڤ گوتی: "سكاڵامان له‌لایه‌ن چه‌ند ماڵباتێكی شاری هه‌ڵه‌بجەوە‌ بۆ هاتووه‌ له‌سه‌ر رفاندنی منداڵه‌كانیان و هه‌ڵخه‌ڵه‌تاندنیان له‌لایه‌ن په‌كه‌كه‌وه و،‌ دواتر بردنیان بۆ قه‌ندیل، كه‌ تائێستاش چاره‌نووسیان نادیاره‌، له ‌هه‌مان كاتدا ئه‌م خانه‌وادانه‌ سه‌ردانی په‌كه‌كه‌یان كردووه‌، به‌ڵام ره‌تیان كردووه‌ته‌وه‌ كه‌ منداڵه‌كانیان ببینن".

گوتیشی: "به‌شێكی دیكه‌ی خانه‌واده‌كان له‌ ترسی په‌كه‌كه‌ ناوێرن سكاڵا تۆمار بكه‌ن، بۆیه‌ چاوه‌ڕوان ده‌كرێت زۆرێكی دیكه‌ هه‌بن كه‌ منداڵیان له‌لایه‌ن په‌كه‌كه‌وه‌ برابێت".

ڕفاندن و هەڵخەڵەتاندنی منداڵان لە لایەن پەكەكەوە، یەكێكە لەو ڕێگایانەی ساڵانێكە پەكەكە دەیگرێتە بەر و بە هۆیەوە سەدان ماڵبات دەنگی ناڕەزایی و ڕەخنەیان لە هەمبەر ئەو سیاسەتە هەڵبڕیوە.












باسنیوز