وەکو دیارە خەونا دیموکراتان د چڤاتا پیران دا پێک نە هات، و هەمی هەولێن وان بوکونترول کرنا وێ چڤاتی شکەستن، کو تانها شیاینە ب تەنێ ئێک کورسی ژ کوماریان وەربگرن، هەرچەندە هین شەش گەرێن دن ژی ماینە کو ئەنجامێن وان نە دیارن.

د دەما کو کوماریان شیاینە سەرکەفتنێ ب سەر سیناتورێ کوماری کوری گاردنر ژ کولورادو، و مارسا ماکسالی ژ ئەریزونا بێخن، وان کورسیێ ئالاباما یێ کو سیناتورێ دیموکرات دوج جونز بو، ژ دەست دا.

پارتا دیموکراتان پێدڤیە سێ کورسیان ژ کۆماریان وەربگرن، داکو ب پرانی د چڤاتا پیران دا ب سەرکەڤن، ئەگەر کاندیدێن دیموکرات جو بایدن و سیناتور کامالا هاریس د هەلبژارتنێن سەروک و جیگرێ سەروک دا ب سەرکەڤن.

ل گۆرەی سەنتەر و توڕێن ئیدیسون یێن ڤەکولینان، چار ژ ئەندامێن کوماریان د چڤاتا پیران دا، ئەو ژی، جونی ئێرنست ژ ویلایەتا ئایوا، و ستیڤ دینز ژ مۆنتانا، و لێنزی گراهام ژ ساوس کاڕۆلاینا، و ژ تێکساسێ جۆن کورنین، خوە ل بەرامبەر هەڤرکیا دیموکراتان گرتن، وشیاینە ل جهێ خو بمینن.

و ل کانساسێ کوماری سەرکەفتن ب دەست ئینان، کو روجر مارشال سەرکەفتن سەر باربرا بولییر یا دیموکرات ئینا.

لێ سیناتورا پارتا کوماری سوزان کولێنز، کو بۆ دەمەکی درێژ دهات پێشبینیکرن دێ شەکستنێ ئینیت، شیایە ل ویلایەتا مین سەرکەفتن ل سەر سارا جیدیون یا دیموکرات تومار بکەت.

و هەر وەسا سیناتورێ کوماری تۆم تیلیس، ژ نورس کاڕولاینا، سرکەفتنێ بەرامبەری هەڤرکێ خو یێ دیموکرات کال کانینگهام ئینا.

بەهرەیا کوماریان ب پڕانیا کورسیان نها پترە کو وان 53 کورسی هەنە بەرامبەر 47 بۆ دیموکراتان، لێ دهێتە پێشبینی کرن کو پارتا دیموکرات کونترولا خو د چڤاتا نوونەران دا کو ژ 435 کورسیان پێک تێ بپاڕێزن.











باسنيوز