بۆمبێکی داعش لە دەشتی قەراجی سنووری مەخموور تەقیەوە، باوکێک و سێ کوڕی پێکەوە کوشتن. خەڵکی مەخموور دەڵێن شەوان داعش حاکمی ئەو دەڤەرەیە و بۆمب دەچێنن.

هونەر بەهرام، برا و مامی قوربانییەکانە و دەڵێت، "ئەو ناوچە بە شەوان هی داعشە. بە رۆژیش داعش خۆی مات دەکات و نایەتە دەرەوە. ئاسایش نییە. سوپا بەس رێگەیان گرتووە. ئەم فەقیرە بۆ کشتوکاڵ چووە، ئەگەر کارێک نەکات ناژی."

سالم بەهرام و سێ کورەکەی بە ناوەکانی "سەفین، سەروەر و قاسم" هەر لە شوێنی تەقینەوەکە گیانیان لە دەستداوە. کوڕێکی دیکەشیان کە ناوی محەممەدە تەمەنی 15 ساڵە، بریندرارە و ئێستا لە هەولێر چارەسەری بۆ دەکرێت.

دوای راپۆرتی پزیشکی دادوەری، تەرمەکان برانەوە بۆ مەخموور و لەوێ بە خاک سپێردران. کوردی ناوچەکە بەهۆی نەبوونی ئارامی و ئاسایشەوە دڵیان پڕە.

حوسێن بەهرام، برا و مامی قوربانییەکانە و دەڵێت، "برایکم و سێ برازام مینیان پێدا تەقیەوە و ئۆتۆمبێلەکەشیان سووتاوە. کە چوومە سەریان، دەست و لاقیانمان کۆکردنەوە. لەم ناوچەیەدا هیچ ئاسایشێک نییە. ئەو رێگەیە رێی جووتیاریمانە."

لەگەڵ دانیشتوویەکی ناوچەکە چووینە شوێنی رووداوەکە: رۆژئاوای دەشتی قەراج لە سنووری قەزای مەخموور، ئەو ناوچەیەی سنووری هەر چوار پارێزگای هەولێر، نەینەوا، کەرکوک و سەلاحەدین پێکەوە دەبەستێتەوە.

دانیشتووانی ناوچەکە کە لەژێردەسەڵاتی سووپا و هێزە عێراقییەکاندان هەمیشە دەڵێن ژیانیان لێهەڵگیراوە و دوای کشانەوەی پێشمەرگە لە ساڵی 2017وە داعش بە ئاسانی و بەتایبەتی لە شەودا جموجووڵی تێدا دەکەن.

سنووری مەخموور و بناری رۆژئاوای چیای قەرەچوخ ئەو ناوچانەن چەکدارە جێماوەکای داعش جموجووڵی تێدا دەکەن و بنکەیان داناوە. بەهۆی ئەو مەترسییانەشەوە ئێستا لە سنوورەکە زیاتر لە 30 گوند چۆڵکراون کە زۆربەیان کوردن.

RUDAW -