بەشی ڕاگه‌یاندن و په‌یوه‌ندییه‌كانی به‌ڕێوه‌به‌رایه‌تیی‌ پۆلیسی‌ پارێزگای‌ سلێمانی‌ ئاشکرای کردووە له‌سه‌ر سكاڵای‌ دوو هاوڵاتی‌ مه‌فره‌زه‌كانی‌ به‌شی‌ پۆلیسی‌ دوكان دوو تۆمه‌تباریان ده‌ستگیر كردووە.

لەمبارەوە ئەمڕۆ دووشەممە 19ی 10ی 2020 بەڕێوەبەرایەتیی پۆلیسی پارێزگای سلێمانی، لە پێگەی خۆی لە تۆڕی کۆمەڵایەتیی (فەیسبووک) بڵاوی کردووەتەوە: "دوای‌ ئه‌وه‌ی‌ ڕۆژی‌ 14ی‌ 10 ی‌ 2020 دوو هاووڵاتی‌ سكاڵایان له ‌به‌شی‌ پۆلیسی‌ دوكان تۆمار كرد كه‌ فرۆشگەكانیان له ‌سنووری‌ قه‌زاكه‌ بڕدراوه ‌و دزییان لێ كراوه‌، مه‌فره‌زه‌كانی‌ به‌شی‌ پۆلیسی‌ دوكان لێكۆڵینه‌وه‌كانیان ده‌ست پێ كرد و تواندرا پاش چه‌ند كاتژمێرێك له‌ ڕووداوه‌كه‌ یه‌كێك له‌ تۆمه‌تباره‌كان ده‌ستگیر بكرێت".

ئاماژە بەوەش کراوە: "لێكۆڵینه‌وه‌كانی‌ پۆلیس بۆ گه‌ڕان به‌دوای‌ تۆمه‌تباره‌كه‌ی‌ تر به‌رده‌وام بوو تا ئه‌وه‌ی‌ ئه‌مڕۆ دووشەممە به ‌هاوكاریی‌ بنكه‌ی‌ پۆلیسی‌ چوارچرا له ‌شاری‌ سلێمانی‌ توانرا ده‌ستگیر بكرێت و له‌كاتی‌ ده‌ستگیركردنیشیدا ده‌ست گیراوە به‌سه‌ر بڕێك مادده‌ی‌ هۆشبه‌ر كه ‌تۆمه‌تبارەکە پێی بووە".

ئێستا تۆمه‌تباران (ه. ح. م ) له‌دایكبووی‌ 1990 و (ب. س. م) له‌دایكبووی‌ 2000 كه‌ پێشینه‌ی‌ تاوانیشیان هه‌یه‌ به ‌فه‌رمانی‌ دادوه‌ر ڕاگیراون و لێكۆڵینه‌وه‌ له‌گه‌ڵیان به‌رده‌وامه‌.












باسنيوز