جێگری سەرۆكی پەرلەمانی كوردستان، بە توندی ئیدانەی پەلاماری بەشێک لە ھێزەکانی حەشدی شەعبی بۆ سەر بارەگای لقی پێنجی پارتی دەكا و بە كارێكی "ترسنۆكانە و شەرمەزارانە"ی دادەنێ.

ئەمڕۆ شەممە 17/10/2020، هێمن هەورامی، جێگری سەرۆكی پەرلەمانی كوردستان، لە ڕێی پۆستێكی پەیجی فەرمیی خۆیەوە لە فەیسبووك، ئیدانەی هێرشكردنە سەر لقی پارتیی لە بەغدا و سووتاندنی ئاڵای كوردستانی كرد و داوای لە دەسەڵاتدارانی باڵای عێراق كرد بێدەنگ نەبن.

هێمن هەورامی، ئاماژەی بەوەش كردووە "جێگای نیگەرانییەکی زۆرە ئەم رووداوە بە بەرچاوی ھێزە ئەمنییەکانی عێراقەوە ئەنجام درا. ئەم کردەوە شەرمەزاری و نا بەرپرسیارانەی لایەنێکی ناو حەشدی شەعبی، دووپاتی ئەو عەقڵییەتە شۆڤینی و مەزھەبیە توندڕەو و تاریکپەرستییە دەکاتەوە، کە بە درێژایی ١٠٠ ساڵی عێراق، نەتەوەی کورد و پیرۆزییەکانی لای ئەوانە قبووڵکراو نییە".

سەرنج دەخاتە سەر ئەوەش، كە "رووداوەکەی ئەمڕۆ ئەلقەیەکی دیکەی زنجیرەی ئەو کارەسات و نەھامەتییانەن کە ھەمان عەقڵییەت لە بەرگی بەشێکی نیزامی مەلەکی و حەرەس قەومی و بەعس و داعش و قاعیدە بەرامبەر کورد و کوردستان کراوەو دەکرێت".

جێگری سەرۆكی پەرلەمان، بە پێویستی دەزانێ سەرکۆماری عێراق و سەرجەم کوتلە کوردستانییەکان و سەرۆک وەزیران و سەرۆکی پەرلەمان لە ئاست ئەم پێشھاتە ھەڵوێستی ڕوون و ھەنگاوی کرداری بنێنن "بۆ ئیدانە کردن و لێپێچینەو لە ئەنجامدەران".











باسنيوز