قایمقامێ شنگال: هەر پێنگاڤەكا باش بهێتە هاڤیتن لایەنێن نە شەرعی دبن ئاستەنگ
مەحما خەلیل، قایمقامێ قەزا شنگال راگەهاند كو: "لایەنێن نە شەرعی دەست ب زێدەتر تێكڤەدانا رەوشا شنگال كرینە كو لایەنێن نە شەرعی دناڤ شنگالێ دا دڤێت شنگال بێ یاسا بیت چونكو بەرژەوندیا وان دایە قانوون ل شنگال نەبیت، لەورا ژی دەست پێنگاڤێن تێكڤەدانێ دكەن ژبەر كو ئەو لایەنێن نەشەرعی باش دزانن بریارەكا راست و دروست بۆ چارەسەركرنا رەوشا شنگال هاتیە دان وئێدی جهێ هێزێن نەشەرعی دناڤ شنگال دا نەما لەورا ئەو هێز یێ خەلكێ پالڤەددن بۆ خۆ پێشاندانێ. دخوازن تێكڤەدانێ بكەن بۆ مەرەمێن خۆ یێن سیاسی".
مەحما خەلیل، گۆت: "رێكەڤتنا ناڤبەرا حكومەتا هەرێما كوردستانێ و عێراقێ دا ل سەر ئاساییكرنا رەوشا شنگال دێ بیتە ئەگەر هێزێن نە شەرعی دناڤ شنگال دا نەمینن لەورا ئەو هێزێن نە شەرعی دێ پێنگاڤان هاڤێژن دا رەوشا شنگال پتر لاواز بكەن وبەرژوەندیێن خۆ یێن سیاسی ل سەر خەلكێ شنگال دەست خۆ ڤە بینن".
قایمقامێ شنگال دیار كر كو: "هەر خۆپێشاندانەك و تێكڤەدانەك بهێتە كرن هیچ گرنگیەك بۆ خەلكێ شنگال نینە ئەو رێكەڤتنا هاتیە كرن دناڤبەرا هەولێر و بەغدا دێ بجه ھێت و دێ ئاڤەدانی و تەناهیێ ل شنگال دروست بیت".
باسنیوز
