چەند دۆسیەیه‌کی گرنگ لەنێوان ھەولێر و بەغدا ھەیە، تا ئێستا ھەنگاوی باشی نەبڕیوە و بەغدا خۆی لە جێبەجێکردنیان دەدزێتەوە، گرنگترینیان جێبەجێکردنی ماددەی 140ـه‌، سەرۆکی حکومەتی ھەرێمی کوردستان لە پەرلەمانی کوردستان ھەڵوێستی حکومەتی بە روونی لەسەر کێشەی ناوچە کوردستانییەکان خستەڕوو. پسپۆڕانیش لەو بارەیەوە دەڵێن: دەبێت حکومەتی ھەرێمی کوردستان کارتەکانی بۆ جێبەجێکردنی ماددەی 140 بەکار بھێنێت؛ چونکە بەغدا نایەوێت ئەو ماددەیە جێبەجێبکات.

خەلیل ئیسماعیل، مامۆستای زانکۆ گوتی: هەڵوێستەکانی سەرۆکی حکومەت لەبارەی جێبەجێکردنی ماددەی 140 هەڵوێستی نیشتیمانی و جددین و پێشنیاز دەكەم حکومەتی هەرێمی کوردستان کارته‌كانی بۆ جێبەجێکردنی ماددەی 140 بەکار بهێنێت.

ئێستا لە ناوچە کوردستانیەکان جگە لە تەعریب و داگیرکاری، دۆخی ئەمنیش خراپە و داعش چالاکیەکانی زیاتر كردووە، بەجێبەجێکردنی ماددەی 140 ئەم کێشانە چارەسەر دەبن. بەڵام حکومەتی عێراق رێگرە لە جێبەجێکردنی ئەم ماددەیە، کە لە دەستووردا جێگیرکراوە.

محەمەد سابیر، پسپۆڕی سەربازی گوتی: ھەڵوێستەکانی مەسرور بارزانی لەسەر ماددەی 140 نیشتیمانین و لەو بڕوایەدامە، بەجێبەجێکردنی ماددەی 140 کێشەکانی عێراق بە تەواوەتی چارەسەر دەبن.

مەسرور بارزانی لە بارەی جێبەجێکردنی ماددەی 140 و بەردەوامی تەعریب لە وەڵامی پەرلەمانتاراندا، ئاماژەی بەوەدا، بەھیچ شێوەیەك ئەو ھەنگاوانەمان قبووڵ نەبووە و لەگەڵ بەغدا قسەی زۆر لەسەر ئەو حاڵەتە کراوە و گوتی: دوو ھەنگاومان پێشنیازکردووە بۆ ئەو ناوچانە. یەکێکیان دابینکردنی ئەمنیەتە لەو شوێنانە کە دابڕێنراون بۆ پاراستی ھاووڵاتیان و رێگری لە تەعریب بکرێت و ھەماھەنگی نێوان پێشمەرگە و سوپای عێراق بۆ دابینکردنی ئاسایش و ئەمنیەت لەو ناوچانە ھەبێت.

گوتیشی: چارەسەرکردنی ئەو کێشانە تەنیا و تەنیا بەجێبەجێکردنی ماددەی 140 دەبێت، کە پێشنیازکراوە و داکۆکی لە جێبەجێکردنی دەکەین و لەسەر ئەو بابەتە لەسەر خەتین، پسپۆڕانی ئەمنی و سیاسیش ھەڵویستەکانی سەرۆکی حکومەت بە نیشتیمانی و جددی دەزانن.
k24 -