بەبڕیاری ئیدارەی سەپێندراوی كەركووك، ماوەی چەند رۆژێكە دەست كراوە بە ڕووخاندنی خانووی هاووڵاتییانی كوردی شارەكە بەبیانووی نەبوونی تاپۆوە و هۆشدارییش بە خاوەنی دەیان خانووی دیكە دراوە كە خانووەكانیان چۆڵ بكەن، بەو پێیەی پرۆسەی ڕووخاندنەكە بەردەوام دەبێت.

ئەمڕۆ دووشەممە 5/10/2020، سامان كەریم، دانیشتووی گەڕەكی (گۆڕەپانی ئاهەنگەكان)ی كەركووكە و وەك شایەتحاڵیك، ڕایگەیاند، لە دوای 16ی ئۆكتۆبەری 2017ەوە هەڕەشەی ئەوەمان لەسەر بوو كە خانووەكانمان بڕووخێنن، ماوەی چەند رۆژێكە بە كردەیی لەسەر بڕیاری راكان جبووری دەست كراوە بە ڕووخاندنی خانوو و تا ئێستا 80 خانوویان ڕووخاندووە لەگەڵ دەیان دوكاندا".

گوتیشی، ماڵەكانی تریش ئاگادار كراونەتەوە كە تاوەكوو سبەی سێشەممە خانووەكانیان چۆڵ بكەن، چونكە شۆفەڵ دەهێنن و دەیڕوخێنن و ئێستاش خەڵك دەستیان بە باركردن لەگەڕەكەكە كردووە كە زۆرینەی دانیشتوانی گەڕەكەكەش كەمدرامەتن و خەڵك توانای ئەوەی نیە بڕات لەناو خانووی كرێ دابنیشێت و هەروەها حكوومەتیش هیچ بەڵێنیكی قەرەبووكردنەوەی نەداوە، دانیشتووانی گەڕە‌كەكە هاورایان لێ هەستاوە و كەسیش گوێیان پێ نادات.












باسنیوز