لە دهۆک بنکەیەک بۆ ناساندنی ئایینی زەردەشتی دەکرێتەوە
ئارام مەهدی، گەنجێکی شاری دهۆکە کە 10 رۆژە بە فەرمی پەیوەندیی بە ئایینی زەردەشتییەوە کردووە.
ئارام مەهدی، کرێکارە و دەڵێت، "بیری زەردەشتی گەلێک فراوانە و گرێدراوی سرووشت، پێکەوەژیانی مرۆڤ، خۆزا و فەرهەنگ و رەسەنایەتیی کوردە. من کورد لە بیر و باوەڕی زەردەشتیدا دەبینم".
لە دەستپێکی ئەم مانگەدا کۆمەڵەی یەسنا بۆ زیندووکردنەوەی فەرهەنگ و فەلسەفەی زەردەشتی کرایەوە. لە ماوەی دوو حەفتەدا 30 کەس بوونەتە ئەندامی.
ھێلان چیا، نوێنەری کۆمەڵەی یەسنا لە دهۆک بە تۆڕی میدیایی رووداوی راگەیاند، "ئامانج و کاروباری ئێمە لەم بنکەیەدا بۆ زیندووکردنەوەی فەرهەنگ و فەلسەفەی زەردەشتییە تا خزمەتی پەیامی زەردەشتی بکەین."
لەم ماوەیەدا پەیڕەوانی ئایینی زەردەشتی لە دهۆک رووبەڕووی چەندین هەڕەشەی راستەوخۆ و ناڕاستەوخۆ بوونەتەوە.
دیاکۆ خاتوون، هونەرمەندە و دەڵێت، "لە تۆڕە کۆمەڵایەتییەکاندا هەموو جۆرە هەرەشەیەکمان لێکراوە و ناوی هەڕەسەکاران لامانن و ئەوە پەیمەکەمان سارد ناکاتەوە و بەردەوام دەبین".
لە هەرێمی کوردستان 300 هەزار پەیڕەوی ئایینی زەردەشتی هەن.
rudaw
