بەڕێوەبەرایەتیی هاتووچۆی هه‌ولێر رایگەیاند، هاونیشتمانیان، شۆفێران و خاوەن ئۆتۆمبێلەکانی هەڵگری تابلۆی هەولێر دەتوانن لەکاتی گەشتکردنیان بۆ دەرەوەی وڵات، بە ئۆتۆمبێلی خۆیان گەشت بکەن و تابلۆی پیتی ئینگلیزی و شێوەی ئەوروپیش بە چەند مەرجێک وەرگرن.

ئەو مەرجانەی هاتووچۆی هەولێر بڵاویکردوونەتەوە بریتین لە حەوت مەرج، بەمشێوەیەی خوارەوە:

1- ده‌بێت ساڵیانه‌ به‌ناوی ئه‌و كه‌سه‌ بێت كه ‌به‌نیازه‌ گه‌شتی ده‌ره‌وه‌ بكات یان بریكارنامه‌ (وه‌كاله‌)ی بۆ كرابێت.

2- سه‌ردانی گومرگی هه‌ولێر بكات به‌مه‌به‌ستی ده‌رهێنانی پسووڵه‌ی چوونه‌ده‌ره‌وه ‌(دفتر خروجیه).

3- سه‌ردانی هاتووچۆ بكات و داواكارییه‌ك پێشكه‌ش بكات كه ‌تێیدا داوای رێگەپێدان بۆ گۆڕینی تابلۆیه‌كه‌ بكات و ‌پسووڵه‌ی چوونه‌ده‌ره‌وه‌ی له‌گه‌ڵ هاوپێچ بكات.

4- دانی بڕی 55000 دینار وه‌كو رسومات بۆ وه‌رگرتنی دوو پلیتی تازه‌، تابلۆ به ‌نووسین و ژماره‌ی ئینگلیزی.

5- ده‌بێت له‌پاش وه‌رگرتنی تابلۆیه‌كه‌ و ‌جێهێشتنی تابلۆیه ‌كۆنه‌كانی خۆی له ‌هاتووچۆ له ‌ماوه‌ی 72 كاژێر هه‌رێمی كوردستان جێبهێلێت.

6- له‌كاتی گه‌ڕانه‌وه‌ی بۆ هه‌رێمی کوردستان ده‌بێت له ‌ماوه‌ی یه‌ك هه‌فته‌دا سه‌ردانی هاتووچۆ بكات بۆ دانه‌وه‌ی تابلۆیه‌كه‌ و ‌وه‌رگرتنه‌وه‌ی تابلۆیه‌ كۆنه‌كانی كه ‌هه‌ردوو كاتی چوونه‌ده‌ره‌وه‌ و هاتنه‌وه‌شی له‌ڕێگەی پاسپۆرته‌كه‌یه‌وه‌ ده‌زانرێت و ‌ده‌بێت هاوپێچی بكات له‌كاتی هاتنی بۆ هاتووچۆ.

7- هه‌ر دواكه‌وتنێك له ‌چوونه‌ده‌ره‌وه‌ له ‌هه‌رێمی کوردستان یان گه‌ڕانه‌وه‌ بۆ هه‌رێمی کوردستان و ‌سه‌ردانی نه‌كردنی هاتووچۆ بۆ ته‌سلیمكردنه‌وه‌ی تابلۆیه‌كه‌ له ‌ماوه‌ی دیاریكراو، سه‌رپێچیكار به ‌بڕی 500 هەزار دینار سزاده‌درێت و ‌بۆ هه‌ر رۆژێك كه‌ تێپه‌ڕێت بڕی 50 هه‌زار دیناری دیکە ده‌چێته‌سه‌ر سزایه‌كه‌.



rudaw