گوتەبێژی حکوومەتی هەرێمی کوردستان لە راگەیەندراوێکدا ڕایگەیاند کە پێویستە گشت فەرمانبەرانی حکوومەت پابەند بن بە دەوامی فەرمی لە یەکشەممە تا پێنجشەممەی هەموو هەفتەیەک لە کاتژمێر ٨ بۆ ٣ی پاشنیوەڕۆ.

لە راگەیەندراوەکەدا کە وێنەیەکی بۆ(باسنیوز) نێردراوە د.جووتیار عادل، گوتەبێژی حکوومەتی هەرێمی کوردستان ئاماژەی بە ئەوە داوە کە پێویستە فەرمانبەرانی هەرێمی کوردستان، ئەرکەکانی سەر شانیان جێبەجێ بکەن و پابەندبن بە دەوامی فەرميی وەزارەت و دامەزراوەکانیان، لەدەستپێکی دەوامی فەرمی لە ڕۆژانی یەکشەمەوە تا کۆتایی دەوام لە ڕۆژانی پێنجشەمە، لە کاتژمێر (٨:٠٠)بەیانی تا (٣:٠٠) دوای نیوەڕۆ.

ئەمەی خوارەوە دەقی راگەیەندراوەکەیە:-



ڕاگەیاندراوێک لە گوته‌بێژی حكومه‌تی هه‌رێمی كوردستان

- پێویستە گشت فەرمانبەرانی حکومەت پابەندبن بە دەوامیی فەرمی لە یەکشەممەوە تا پێنجشەممە لە کاتژمێر (٨:٠٠)بەیانی تا (٣:٠٠) دوای نیوەڕۆ. لە کاتی دەوامیشدا پابەندبن بە گشت رێنمایی و رێكاره‌ ته‌ندروستییه‌كانی خۆپارێزی لە ڤایرۆسی كۆرۆنا.

به‌ له‌به‌رچاوگرتنی به‌رژه‌وه‌ندی گشتی و له‌ پێناو باشتر خزمه‌تكردنی هاووڵاتییان و راپەڕاندنی كاره‌كانیان له‌ داموده‌زگاكانی حكومه‌ت و گەیاندنی خزمه‌تگوزارییه‌ گشتییه‌كان و ئاماژە بە ھەردوو بریاری ژمارە (١)ی ئەنجومەنی وەزیران لە ١٥/ ٧/ ٢٠١٩ و بڕیاری (٥٢) لە ٥/ ٥/ ٢٠٢٠.

جەخت دەکەینەوە لە سەر پابەندبوونی سەرجەم ئەو فەرمانبەرانەی بە خزمەتی گشتی ڕاسپێردراون و گشت کارمەندانی حکومەت لە وەزیر و سەرۆک دەستەکان و خاوەن وەزیفە باڵاکان و ئەوانەی ئەو پلەشیان هەیە و کارمەندانی ڕاژەی شارستانی و هێزە چەکدارەکان وهێزەکانی ئاسایشی ناوخۆ لە گشت وەزارەت و دەستە و دامەزراوەکانی دیکەی هەرێمی کوردستان، ئەرکەکانی سەر شانیان جێبەجێ بکەن و پابەندبن بە دەوامی فەرميی وەزارەت و دامەزراوەکانیان، لەدەستپێکی دەوامی فەرمی لە ڕۆژانی یەکشەمەوە تا کۆتایی دەوام لە ڕۆژانی پێنجشەمە، لە کاتژمێر (٨:٠٠)بەیانی تا (٣:٠٠) دوای نیوەڕۆ.

هەروەها پێویسته‌ له‌ كاتی ده‌وامدا، فه‌رمانبه‌ران پابەندبن بە گشت رێنمایی و رێكاره‌ ته‌ندروستییه‌كانی خۆپارێزی لە ڤایرۆسی كۆرۆنا.

د. جوتیار عادل

گوته‌بێژی حكومه‌تی هه‌رێمی كوردستان

٢٠٢٠/٩/٣








باسنيوز