پێشنیازکراوە سەرەتای مانگی 10 خوێندنی زانکۆ و پەیمانگەکان دەستپێبکاتەوە
د. عەبدولفەتاح عەبدولڕەزاق، بریکاری وەزارەتی خوێندنی باڵا و توێژینەوەی زانستیی هەرێمی کوردستان بە تۆڕی میدیایی رووداوی راگەیاند "پێشنیازکراوە کە کۆتایی مانگی 9 و سەرەتای مانگی 10 دەوامی زانکۆ و پەیمانگەکان بۆ ئەمساڵی خوێندن دەستپێبکاتەوە".
بریکاری وەزارەتی خوێندنی باڵا و توێژینەوەی زانستیی هەرێمی کوردستان ئاماژە بەوەش دەدات، سیستمی خوێندنی تێکەڵاو بەوجۆرەیە کە ئەو کۆلێژ و بەشانەی وانەی پراکتیکییان هەیە دەگەڕێنەوە کامپسی زانکۆ و پەیمانگەکان ئەوانیشی وانەکانیان تیۆرین بەشێوەی ئەلیکترۆنی و ئۆنلاین دەبێت.
ئەمڕۆ ئەنجوومەنی وەزارەتی خوێندنی باڵا و توێژینەوەی زانستیی هەرێمی كوردستان بۆ چۆنیەتی دەستپێكردنی دەوام لە ساڵی نوێی خوێندن کۆبووەوە و دوای چەند کاژێرێک کۆبوونەوەکە کۆتاییهات.
عەبدولسەلام دۆڵەمەڕی، سەرۆكی لیژنەی پەروەردە و خوێندنی باڵا لە پەرلەمانی كوردستان بە رووداوی راگەیاندبوو، کە لە مانگی ئەیلوولدا پرۆسەی خوێندن لە هیچ قۆناخێكی خوێندن دەست پێناكاتەوە، بۆ پرۆسەی خوێندنی لە زانكۆ و پەیمانگەكانیش سیستەمی ئاوێتە بە گونجاو دەزانێ، كە خوێندنە بە هەر دوو شێوازی ئەلیكترۆنی و ناو كامپەسی زانکۆکان بێت.
بە گوتەی عەبدولسەلام دۆڵەمەڕی، ئێستا عێراقیش بڕیاریداوە بەو جۆرە خوێندنی زانكۆ و پەیمانگەكان لە06-12-2020 دەستپێبكات.
لە چوارچێوەی رێکارەکانی رێگریکردن لە بڵاوبوونەوەی ڤایرۆسی کۆرۆنا لە هەرێمی کوردستان، لە کۆتاییەکانی مانگی شووباتی ئەمساڵ، ناوەندەکانی خوێندن داخران و دواتر خوێندن کرا بە ئۆنلاین
rudaw
