بەپرسانی ئەمریکی دەڵێن لە ئەنجامی پێکدادانەکەی ئەم هەفتەیەی ئۆتۆمبێلەکانی رووسیا و ئەمریکا لە رۆژئاوای کوردستان، ژمارەیەک سەربازی ئەمریکی برینداربوون.

دوو بەرپرسی ئەمریکی بە ئاژانسی رۆیتەرزیان گوتووە، سەربازە ئەمریکییەکان بە بەریەککەوتنی ئۆتۆمبێلەکانیان برینداربوون و هیچ شەڕە تەقەیەک لەنێوان هێزەکانی ئەمریکا و رووسیا رووینەداوە.

ئەو دوو بەرپرسە کە نەیانویستووە ناویان ئاشکرابکرێت دەڵێن، رووداوەکە لە باکووری رۆژهەڵاتی سووریا روویداوە، دەشڵێن "برینی سەربازەکانیان سووکە".

پێنتاگۆن هیچ لێدوانێکی لەوبارەیەوە نەداوە، بەڵام پێشتر چەندینجار بینراوە و ڤیدیۆش تۆمارکراوە کاتێک ئۆتۆمبێلەکانی رووسیا و ئەمریکا لە رۆژئاوای کوردستان رێ بەیەکدی دەگرن؛ ئەمەش یەکەمجارە بەریەککەوتنی ئۆتۆمبێلەکانیان رووبدات.


rudaw