ڕێکخراوی تەندروستیی جیهانی (WHO) ئاشکرای کرد لە نوێترین چالاکیی خۆیدا لە هەرێمی کوردستان، لەناو وەزارەتی تەندروستیی حکوومەتی هەرێمی کوردستان، نووسینگەیان کردووەتەوە و هەوڵەکانی حکوومەتی هەرێم بۆ بەرەنگاربوونەوەی پەتای کۆرۆنا بەرز دەنرخێنێت.

لەمبارەوە د. سامان بەرزنجی وەزیری تەندروستیی حکوومەتی هەرێمی کوردستان ڕاگەیاند: "بۆ ڕووبەڕووبوونەوەی ڤایرۆسی کۆرۆنا پێویستیمان بە ھاوکاریی رێکخراوی تەندروستیی جیھانی دەبێت، لەبەر ئەوەی لە وەرزی تەشەنەکردنی ڤایرۆسەکە داین، پێوستمان بە ھاوکاری ھەموو لایەکە، بۆ خۆئامادەکردنیش بۆ وەرزی سەرما و رووبەڕووبونەوەی ڤایرۆسەکە، کردنەوەی نووسینگەی رێكخراوی تەندروستی جیھانی پاڵپشتییەکی باشە بۆ وەزاەرەتی تەندروستی و رووبەڕوبوونەوەی ئەو پەتایە".

هاوكات وائیل حەتاحیت، نوێنەری رێکخراوی تەندروستیی جیھانی لە ھەرێمی کوردستان گوتی: "حکوومەتی ھەرێمی کوردستان کاری باشی بۆ رووبەڕووبوونەوەی ڤایرۆسەکە کردووە و پاڵپشتی ھەوڵەکانیشیان دەکەین و رێکاری باشیان گرتووەتەبەر و بە کردنەوەی نووسینگەکەشمان دەمانەوێت پاڵپشتیی زیاتری كەرتی تەندروستیی كوردستان بكەین، بەتایبەتی لە رووبەڕووبوونەوەی ڤایرۆسی كۆرۆنادا".

هاوکات دوێنێ چوارشەممە ھەر یەك لە كۆنسولی ئەمریكا لە ھەولێر و رێكخراوی تەندروستیی جیھانی (WHO) و نەتەوە یەكگرتووەكان ھاوكاریی پزیشكی و پێداویستیی تەندروستیان بۆ رووبەڕووبوونەوەی كۆرۆنا پێشكەش بە وەزارەتی تەندرووستی كردووە، كە بریتین لە 6 ئۆتۆمبێلی فریاكەوتن، 60 ئامێری ھەناسەدان بە بڕی 105 ھەزار دۆلار و پێداویستیی دیكەی پزیشكی، بڕیاریشە لە مانگی داھاتوودا دووەم كاروانی ھاوکارییەکانی رێكخراوی تەندروستی جیھانی بگاتە ھەرێمی کوردستان".











باسنیوز