ئەندامێكی فراكسیۆنی پارتی دیموكراتی كوردستان له‌ په‌رله‌مانی كوردستان رای گەیاند كە ئەو گرفتەی كە بەهۆیەوە ژمارەیەك شۆفێر لە زاخۆ گردبوونەوەیان ئەنجام دا، چارەسەر كراوە.

شەوی ڕابردوو، ژمارەیەك لە شۆفێرانی بارهەڵگر لە زاخۆ گردبوونەوەیەكیان ئەنجام دا و داواكارییەكیان لەبارەی هاتوچۆكردنیان لە دەروازەی سنووریی ئیبراهیم خەلیل هەبوو.

لەمبارەیەوە نزار مه‌لا غه‌فار، ئەندامی لێژنەی ئاسایش و ئەنجوومەنە خۆجێییەكان لە پەرلەمانی كوردستان و ئەندامی فراكسیۆنی پارتی بە (باسنیوز)ی راگەیاند، پاش گردبوونەوەكە په‌رله‌مانتارانی زاخۆی پارتی چونه‌ ناو خەڵكەكە و داواكارییەكانیان گه‌یانده‌ شوێنی خۆی.

ڕوونیشی كردەوە كە دامەزراوە ئیدارییەكانی زاخۆ و دامەزراوە ئەمنییەكانیش لەسەر هێڵن و ”ئه‌وه‌ی گرفت بوو لەمبارەیەوە چاره‌سه‌ر كراوه‌".

پەرلەمانتارەكەی پارتی ئاشكرای كرد كە ”په‌كه‌كه‌ و راگه‌یاندنەكەی، هەوڵێكیان دا بۆ شێواندنی دۆخه‌كه‌، بەڵام زاخۆییه‌كان به ‌فیكه‌ی هیچ كه‌س و لایەنێك هه‌ڵناپه‌رن، بەڵكوو زاخۆ هۆشیاره‌ و ده‌زانێت چۆن مامه‌ڵه‌ ده‌كات".













باسنيوز