کۆمەڵگه‌ی دەروازەی نێودەوڵەتیی حاجی ئۆمەران، چەند ڕێنوێنییه‌كى نوێى له‌باره‌ى چوون و ھاتنی گەشتیاران لەنێوان ھەرێمی كوردستان و ئێران بڵاو كرده‌وه‌.

ئه‌مڕۆ پێنجشه‌ممه‌ 30/7/2020، کۆمەڵگه‌ی دەروازەی نێودەوڵەتیی حاجی ئۆمەران، چەند ڕێنوێنییه‌كى نوێى له‌باره‌ى چوون و ھاتنی گەشتیاران لەنێوان ھەرێمی كوردستان و ئێران بڵاو كرده‌وه‌، ئه‌وانیش بریتین له‌


یه‌كه‌م: سه‌باره‌ت به‌گه‌شتكردنی هاووڵاتییانی هه‌رێمی كوردستان بۆ ئێران:

1- پێویسته‌ پێشوه‌خته‌ ڕه‌زامه‌ندیی وه‌زاره‌تی ناوخۆ وه‌ربگیرێت.

2- پێویسته‌ ڤیزای ئێرانی هه‌بێت.

دووه‌م: سه‌باره‌ت به‌ گه‌ڕانه‌وه‌ی هاووڵاتییانی هه‌رێمی كوردستان كه‌ له‌ ئێران بۆ داخڵبوونی هه‌رێمی كوردستان:

1- هه‌موو ڕۆژی ده‌توانن بێنه‌ ده‌روازه‌ی حاجی ئۆمه‌ران له‌ كاتژمێر 8ی به‌یانی تاوه‌كوو 5ی ئێواره‌.

2- پشكنینی كۆرۆنا له‌سه‌ر ئه‌ركی خۆیان بۆ ئه‌نجام ده‌درێت.

3- به‌ڵێننامه‌ لێیان وه‌رده‌گیرێت كه‌ بۆ ماوه‌ی 14 ڕۆژ له‌ ماڵی خۆیان كه‌‌ره‌نتین بكه‌ن به‌پێچه‌وانه‌وه‌ ڕێكاری یاسایی له‌ به‌رامبه‌ریان ده‌گیرێته‌ به‌ر.

سێیه‌م: سه‌باره‌ت به‌ چوونی هاووڵاتییانی ئێرانی‌ له‌ ھەرێمی كوردستان بۆ وڵاتی خۆیان له‌ ئێران:

1- ئه‌گه‌ر كارتی ئاكنجیبوونی هه‌رێمی كوردستانیان هه‌بێت و ماوه‌ی به‌سه‌رنه‌چووبێت یه‌كسه‌ر ده‌توانن بێنه‌ سنوور و ڕێگایان پێ ده‌درێت بگه‌ڕێنه‌وه ‌ئێران.

2- ئه‌گه‌ر كارتی ئاكنجیبوونیان نه‌بێت، یان ماوه‌ی به‌سه‌رچووبێت، پێویسته‌ سه‌ردانی بنكه‌ی ئاكنجیبوونی پارێزگایه‌ك بكات و مۆری ده‌رچوون لێبدات، ئینجا سه‌ردانی سنوور بكاتن بۆ چوونی ئێران.

چواره‌م: سه‌باره‌ت به‌هاتنی هاووڵاتییانی ئێرانی و بیانی بۆ هه‌رێمی كوردستان:

1- پێویسته‌ ڕه‌زامه‌ندیی وه‌زاره‌تی ناوخۆ وه‌ربگیرێت.

2- پێویسته‌ بڕوانامه‌ی پشكنینی كۆرۆنای هه‌بێت و ماوه‌ی به‌سه‌رچوونه‌كه‌ی له‌ 48 كاتژمێر تێپه‌ڕنه‌بووبێت.

3- دووباره‌ پشكنینى كۆرۆنا له هه‌رێمى‌ كوردستان له‌سه‌ر ئه‌ركی خۆیان بۆیان ئه‌نجام ده‌درێت.

4- به‌ڵێننامه‌ لێیان وه‌رده‌گیرێت كه‌ بۆماوه‌ی 14 ڕۆژ له‌ ماڵی خۆیان، یان هۆتێل له‌سه‌ر ئه‌ركی خۆیان كه‌ره‌نتین بكه‌ن به‌پێچه‌وانه‌وه‌ ڕێكاری یاسایی به‌رامبه‌ریان ده‌گیرێته ‌به‌ر.












باسنيوز