گوتەبێژی حكوومەتی هەرێمی كوردستان رای دەگەیەنێت کە پەیوەندی لەگەڵ بەغدا بەردەوامیی هەیە مەرج نییە سەردان بێت، بەڵكوو بە رێگەی كۆمەڵێك ئامراز پەیوەندی هەیە ئەگەرێكی زۆرە دوای جەژن گفتوگۆكان دەست پێ بكەنەوە.

د.جووتیار عادل گوتەبێژی حكوومەتی هەرێمی كوردستان لە لێدوانێكییدا رایگەیاند: "پەیوەندییەكانی هەولێر و بەغدا بەردەوامییان هەیە، ئێمە نیازپاكیی خۆمان نیشان داوە بۆ گفتوگۆ، جەختمان كردووەتەوە ئێمە بۆ هەر رێككەوتنێك پشت بە دەستوور دەبەستین و پابەند دەبین بەپێی رێكارە دەستوورییەكان بۆ ماف و شایستە داراییەكانی خەڵكی هەرێمی كوردستان، بەڵام هەر رێكارێك لە دەرەوەی ماددە و بڕگەكانی دەستوور بێت ئێمە قبووڵی ناكەین".

چەند رۆژێكە دەنگۆیەك بڵاو كراوەتەوە گوایە "حكوومەتی عێراقی رازی بووە لەبەرامبەر رادەستكردنی 50%ی داهاتی خاڵە سنووریەكانی هەرێمی كوردستان مانگانە 300 ملیار دینار بۆ هەرێمی كوردستان بنێرێت"، لە بەرامبەرا د. جووتیار عادل گوتی: "گفتوگۆكان كۆمەڵێك لە بیرۆكە و پێشنیاری تێدا دەخرێتە ڕوو، بەڵام ئەو پێشنیارانە نە حكوومەتی هەرێمی كوردستان پەسندی كردووە نە راستەوخۆ حكوومەتی عێراق باسی كردووە، ئێمە هەر چارەسەرێك دەستووری بێت پێی رازین بەدەر لەوە بێت رەتی دەكەینەوە".

گوتەبێژی حكوومەتی هەرێمی كوردستان ئاماژەی بەوەش دا پاش جەژن گفتوگۆكانی هەولێر و بەغدا بەردەوامییان دەبێت، دەشڵێت: "ئەگەرێكی زۆرە دوای جەژن گفتوگۆكان دەست پێ بكەنەوە، گفتوگۆكان تەنها سەردان نییە، بەڵكوو گفتوگۆ بە تەلەفۆنە، جار جار بە ڤیدیۆ كۆنفرانسە، بۆیە با خەڵك ئاگادار بن پەیوەندی لەگەڵ بەغدا بەردەوامیی هەیە مەرج نییە سەردان بێت، بەڵكوو بە رێگەی كۆمەڵێك ئامراز پەیوەندی هەیە بۆ ئەوەی ئەو گفتوگۆیانە بەردەوام بن، هەر كاتێكیش پێویست بكات ئێمە سەردانی بەغدا دەكەین بۆ دۆزینەوەی چارەسەرێكی دادپەروەرانە بۆ مافەكانی خەڵكی كوردستان".

گوتیشی: "هەموو ئەو گفتوگۆیانە بۆ ئەوەیە بتوانین شایستە داراییەكانی دارییەكان و مووچەی خەڵكی كوردستان و مافەكانی بدرێت، هەروەها كێشەی ناوچە كوردستانییەكان و پرسی پێشمەرگە و غاز و كارەبا و هەماهەنگیی هەولێر و بەغدا لەم دۆسیانە بكرێت".











باسنیوز