بەهۆی كەمیی پێدانی كارەبای نیشتمانی، بەشێك لە هاووڵاتیانی شاری خانەقین خۆپیشاندانێكیان ڕێک خست.

ئەمڕۆ دووشەممە 27/7/2020، بەهۆی كەمیی پێدانی كارەبای نیشتمانی بە هاووڵاتیان، ژمارەیەك لە هاووڵاتیانی خانەقین خۆپیشاندانیان لەبەردەم قایمقامیەتی قەزاكە بەڕێوە برد و دەرگای قایمقامیەتیان داخست و داوایان لە قایمقام و بەڕێوەبەری كارەبای شارەكە كرد هەرچی زووە كار بۆ باشبوونی دۆخی كارەبای نیشتمانی بکەن.

لەمبارەوە سەلام عەبدوڵا، چالاكوانی دیاری كۆمەڵگەی مەدەنی لە خانەقین، ڕایگەیاند: "كارەساتێكی زۆر گەورەیە لە خانەقین كە پێدانی كارەبای نیشتمانی تا ڕادەیەكی زۆر كەم بووەتەوە كە پلەكانی گەرما لە سنوورەكە دەگاتە سەرووی 50 پلەی سیلزی و شەوان دەبێت تا كاتژمێر سێ بۆ چواری بەیانی بمێنینەوە ئەو كاتانە كارەبا بێتەوە بۆ ئەوەی خەڵك بخەوێت، ئەمەش دەرەنجامی ئەوەیە كە لە شارەكە كەرتی كارەبا كراوەتە تایبەت".

گوتیشی: "لایەنە پەیوەندیدارەكانیش نەیانتوانیوە چارەسەری ئەو دۆخە بكەن و ئەوەندەش گەرمە ئێستا خانەقین خەڵك ناتوانێت وەك پێویست بچێتە دەرەوە و لە ماڵیش كارەبا نییە و خەڵك ئێستا زۆر ناڕزاییە لەو دۆخە".













باسنیوز