دوای بڵاوبوونەوەی وێنەی هاونیشتمانییەکی بەتەمەن کە لەسەر شەقامێکە و گوترا مجێوری مزگەوتێک بووە و دەرکراوە، بەڕێوەبەرایەتیی ئەوقافی سلێمانی روونكردنەوەیەکی لەبارەی وێنەکەوە بڵاوکردووەتەوە و دەڵێت، کارمەندی ئەوان نییە و "هیچ پەیوەندییەکی بە وەزارەتەکەمانەوە نییە".

لە روونکردنەوەکەی بەڕێوەبەرایەتیی ئەوقافی سلێمانیدا هاتووە، وێنەی ئەو کەسەی کە لە تۆڕە کۆمەڵایەتییەکاندا بڵاوکراوەتەوە "كارمەندی بەڕێوەبەرایەتیی ئەوقافی سلێمانی نییە و هیچ پەیوەندییەكی بە وەزارەتەكەمانەوە نییە".

لە بەشێکی دیکەی روونکردنەوەکەی ئەوقافی سلێمانیدا هاتووە "روون و ئاشکرایە کە ئەم كارە بە ھیچ شێوەیەک پەیوەست نییە بە وەزارەتمان، بەڵکو دام و دەزگای دیکەی فەرمی هەن کە ئەم کەسانە لەخۆدەگرن".

پێشتر توانا ئەمینی نووسەر وێنەی هاونیشتمانییەکی بەتەمەنی بڵاوکردبووەوە و لەسەر وێنەکە ئاماژەی بەوە کردبوو "ئێستا کاژێر 02:20 خولەکی شەوە، لە نەخۆشخانە بۆ ماڵەوە دەڕۆشتمەوە، لە گەڕەکی عەقاریی سلێمانی و بەرامبەر ئەمنەسوورەکە، لە ناوەڕاستی شەقامەکەدا ئەم پیاوە بەتەمەنە دانیشتووە، چوینە لای زۆر ماندووبوو، مجێوری مزگەوت بووە و دەرکراوە و کەوتووەتە سەر جادە".













رووداو