سەرۆکایەتیی دیوانی ئەنجوومەنی وەزیرانی هەرێمی کوردستان وەڵامی نووسراوێکی پەرلەمانی کوردستان لەبارەی "قەیرانی دارایی و مووچەی فەرمانبەران و دانوستاندنەکانی شاندی هەرێمی کوردستان لە بەغدا" دەداتەوە و دەڵێت، سێ وەزیر، سەرۆکی دیوانی ئەنجوومەنی وەزیران و سکرتێری ئەنجوومەنی وەزیران ئامادە دەبن.

نووسراوەکەی ئەنجوومەنی وەزیرانی هەرێمی کوردستان واژۆی د. ئومێد سەباح، سەرۆکی دیوانی ئەنجوومەنی وەزیرانی هەرێمی کوردستانی لەسەرە و 23-7-2020 دەرچووە. تێیدا هاتووە، ئەو وەزیرانە ئامادە دەبن بریتین لە: "وەزیری دارایی و ئابووری، وەزیری پلاندانان و وەزیری هەرێم بۆ کاروباری دانوستاندن لەنێوان هەرێمی کوردستان و بەغدا لەگەڵ سەرۆکی دیوانی ئەنجوومەنی وەزیران و سکرتێری ئەنجوومەنی وەزیران".

بەپێی نووسراوەکەی سەرۆکایەتیی دیوانی ئەنجوومەنی وەزیران، ئەو وەزیرانە لەگەڵ سەرۆکی دیوانی ئەنجوومەنی وەزیران و سکرتێری ئەنجوومەنی وەزیران لە رۆژی سێشەممە 28-7-2020 لە پەرلەمانی کوردستان ئامادە دەبن.

سەرۆكی پەرلەمانی كوردستان رۆژی 16ـی تەممووزی 2020 بە نووسراوی ژمارە 1200 داوای لە ئەنجوومەنی وەزیرانی هەرێمی كوردستان كردووە، چەند وەزیرێك بەپێی داوای لیژنەكانی پەرلەمان و ئەندامانی پەرلەمان لەسەر پرسە هەنووكەییەكان بنێرێتە پەرلەمان، بۆ ئامادەبوون لە كۆبوونەوەكانی پەرلەمانی كوردستان لە رۆژانی 26 و 27 و 28ـی ئەم مانگە.

لەسەر بنچینەی نووسراوەكەی سەرۆكی پەرلەمان، ئەمڕۆ پێنجشەممە 23ی تەممووزی 2020، هێمن هەورامی جێگری سەرۆكی پەرلەمانی كوردستان، بانگهێشتی پەرلەمانتارانی كرد كە رۆژی یەكشەممە، ئامادەبن بۆ كۆبوونەوەی پەرلەمان.












رووداو