كچه‌كا خه‌لكا قه‌زا زاخۆ، پشتى ل ناڤا بازارێ زاخۆ دا كوژمێ نێزیكی 9 ھزار دۆلارێن ئه‌مریكى دیتی، په‌یوه‌ندى ب پۆلیسان كریه‌ و بۆ خۆدانى زڤراندنه‌ ڤه‌.

مقه‌دم هێمن سلێمان، په‌یڤدارێ رێڤه‌به‌ریا پۆلیسێن پارێزگه‌ها دهۆكێ دیاركر: "دوهى رۆژا ئێك شه‌مبى رێكه‌فتێ 18/7/2020، كچه‌كا خه‌لكا قه‌زا زاخۆ كۆ ژیێ (24) سالیێ دا بوو، ده‌ما قه‌ستا بازارێ زاخۆ كرى، ژ نشكه‌كێ ڤه‌ كوژمێ (8800) دۆلارێن ئه‌مریكى دبینیت و هه‌ر ئێكسه‌ر په‌یوه‌ندى ب پۆلیسێن مه‌ كریه‌".

په‌یڤدارێ پۆلیسێن دهۆكێ ئاماژه‌ ب وێ چه‌ندێ ژى دا: "ئه‌ڤێ كچێ پشتى كۆ ئه‌ڤ كوژمێ زۆر یێ پاره‌ى دیتى ب رێكا هێلا( 104) په‌یوه‌ندى ب پۆلیسێن قه‌زا زاخۆ كریه‌" و گۆت ژى:" دویڤ دا ژلایێ پۆلیسان ڤه‌ ئه‌و كوژمێ پاره‌ى بۆ خۆدانى هاتنه‌ ڤه‌گه‌راندن كۆ خۆدانى داخاز ژ پۆلیسان كربوو دگه‌ل دا د هاریكار بن".

دوپاتى ل وێ چه‌ندێ ژى كر: "ئه‌ڤ هه‌لوێسىتێ ڤێ كچێ ژ هه‌ژى ده‌ستخوشیێ یه‌ و ئه‌ڤ دیاردا ڤه‌گه‌راندنا پارێن به‌رزه‌ بووى بۆ خۆدانان ل پارێزگه‌ها دهۆكێ د زێده‌بوونێ دا یه‌ و ئه‌ڤ چه‌نده‌ ژى بۆ ره‌وشه‌نبیریا خه‌لكێ مه‌ د ڤه‌گه‌ریت و هیڤیخوازین ئه‌ڤ جۆره‌ هه‌لوێسته‌ د به‌رده‌وام بوونێ دا بن".













باسنيوز