قایمقامی قەزای سۆران ڕای گەیاند لە ماوەی 24 كاتژمێری ڕابردوودا لە قەزای سۆران لە ئەنجامی 102 پشكنین، دەرکەوتووە 20 كەسی دیکە تووشی ڤایرۆسی كۆرۆنا بوون و پێویستە هاووڵاتیان خۆپارێزی بكەن، چونكە ڕۆژ لە دوای ڕۆژ ئەم ڤایرۆسە زیاتر بڵاو دەبێتەوە.

كرمانج عزەت، قایمقامی ڕاگەیاند: "بەداخەوە بەهۆی بڵاوبوونەوەی ڤایرۆسی كۆرۆنا لە سنووری قەزای سۆران، لە ماوەی 24 كاتژمێری ڕابردوودا لە كۆی 102 پشكنین، دەرکەوتووە 20 كەسی‌ دیکە لە قەزای سۆران و ناحیەی خەلیفان، تووشی ڤایرۆسی كۆرۆنا بوون".

قایمقامی سۆران گوتیشی: "تەنها یەكێک لە تووشبوان خەڵكی بەستۆرەیە و لە سۆران پشكنینی ئەنجام داوە لە ئەنجام دا ئەویش هەڵگری ئەم ڤایرۆسەیە و ئەوانی دیکە هەموویان خەڵکی سۆران و خەلیفانن".

کرمانج عزەت ڕاشی گەیاند: "هەندێكیان نەخۆشییەكە كاریگەرە بەسەریانەوە و ١٤ کەس لە تووشبووەكان دانیشتووی گەڕەكەكانی "جوندیان، دیانای كۆن، باران، زۆزك و شەهیدانی ئازادی"ن و پێنج تووشبووش خەڵکی ناحیەی خەلیفانن و یەکیشیان خەڵکی بەستۆرەیە".

ڕوونیشی كردەوە: "ئێستا ئەم ڤایرۆسە لە هەموو كوچە و كۆڵانێك بەربڵاو بووە و پێویستە خۆمان بپارێزین بۆ ئەوەی پارێزراو بین، ئەوە شەڕی هۆشیاریی تاكە كە مرۆڤ دەبێت بیكات لەپێناو سەلامەتی خۆی و دەوربەری".







باسنیوز