لە دهۆک کچێکی شەش ساڵان لەجیاتی ئەوەی نەشتەرگەری بۆ قاچی چەپی بکرێت، بە هەڵە نەشتەرگەری بۆ قاچی راستی کراوە و دوای شەش کاژێر گیانی لەدەستداوە.

حاجی دینۆ، باوکی رەحمای شەش ساڵانە و راگەیاند، "دوای نەشتەرگەرییەکە سەیرمان کرد قاچی راستی نەشتەرگەری کراوە، نەک چەپی. کە پزیشکەکە هات گوتم: دکتۆر، ئەوە چیت کردووە؟ گوتی لە ژووری نەشتەرگەری سەیرم کرد قاچی راستی زیاتر پێویستی بە نەشتەرگەرییە تاوەکو چەپی. لەبەر ئەوە وامکردووە. منیش گوتم کە دوای پشکنین و رێککەوتن بڕیاربوو قاچی چەپی نەشتەرگەری بکرێت".

نەشتەرگەرییەکە لە نەخۆشخانەیەکی تایبەتی دهۆک کراوە و کاژێرێکی خایاندووە. دوای شەش کاژێر لە نەشتەرگەرییەکە نەخۆشەکە رەوانەی ماڵەوە کراوەتەوە.

فەلاح عەبدوڵڵا، بەڕێوەبەری کارگێڕیی ئەو نەخۆشخانەیەیە کە نەشتەرگەرییەکەی تێدا کراوە گوتی ، "دوای ئەوەی پزیشکەکە لە نەشتەرگەرییەکە تەواو بوو، ئێمە نەخۆشەکەمان بینی و رێنماییمان دایە ماڵەوەیان و بە تەندروستییەکی باشەوە رەوانەی ماڵەوەمان کردەوە".

دوای رووداوەکە لیژنەیەکی بەدواداچوون لەلایەن بەڕێوەبەرایەتیی تەندروستیی دهۆکەوە بۆ زانینی هۆکاری گیانلەدەستدانی رەحما پێکهێنراوە و تاوەکو ئێستا لە لێکۆڵینەوە بەردەوامن.

د. نزار بەکر، سەرپەرشتیاری لیژنەی لێکۆڵینەوەیە و دەڵێت، "هێشتا زووە کە بڕیار لەبارەی هۆکاری گیانلەدەستدانی رەحما بدەین. دەتوانین بڵێین کە ترشەڵۆک لەنێو خوێنیدا زۆر زیادبووە و کاری لەسەر دڵی کردووە، هەناسەی تەنگ بووە و تای گرتووە. بەڵام کەی ئەوەی بەسەردا هاتووە و بووەتە هۆکاری مردنی، هێشتا کاتی پێویستە".

رەحما لە خێزانێکی حەوت کەسی بوو کە نیشتەجێی شارۆچکەی سێمێلن. رەحما حاجی لە زگماکەوە مێشک و قاچی هەندێک گەشەیان لاواز بووە، بۆ راستکردنەوەی قاچی پشکنین کراوە، وێنەی تیشکیی بۆ گیراوە و پزیشک بڕیاریداوە قاچی چەپی نەشتەرگەری بۆ بکرێت.








رووداو