گوتەبێژی پۆلیسی ڕاپەڕین ڕای گەیاند ئەمڕۆ چوارشەممە لە گوندێکی سنووری قەزای پشدەر، ئەسپێک کە هەوسارەکەی لە دەستی منداڵێک ئاڵاوە و ڕای کێشاوە، بەو بۆنەوە منداڵەکە گیانی لەدەست داوە.

شۆڕش ئیسماعیل، گوتەبێژی پۆلیسی ڕاپەڕین ڕایگەیاند: "پێشنیوەڕۆ ئەمڕۆ چوارشەممە 2020.7.15 تەرمی منداڵێکی تەمەن 11 ساڵ (کوڕ) بەناوی (ھـ . ئـ) کە دانیشتووی گوندی (سپێرۆ)ی سنووری شارەدێی "ژاراوە"ی سەر بە قەزای پشدەرە، گەیەندرایە نەخۆشخانەی قەڵادزێ".

گوتیشی: "بە گوتەی کەسوکاری منداڵەکە کە لە بناری قەندیل مەڕدارن، کوڕەکەیان ویستوویەتی ئەسپەکەیان ڕابکێشێ و دواتر ئەو گوریسەی بە هەوساری ئەسپەکەوە بووە لەدەستی منداڵەکە گیر بووە و ئەسپەکەش ڕای کێشاوە و بەو ھۆیەشەوە منداڵەکە گیانی لەدەست داوە".

باسی لەوەش کرد: "ئێستا دۆسیەی لێکۆڵینەوە بۆ ڕووداوەکە کراوەتەوە".











باسنیوز