گوتەبێژی وەزارەتی ئاوەدانکردنەوە و نیشتەجێکردنی حکوومەتی ھەرێمی کوردستان ئاشکرای کرد، نزیکەی١٠ ھەزار یەکەی نیشتەجێبوون لە شار و شارۆچکەکان بۆ کەمدەرامەتان و کرێنیشیان لە قۆناغی دروستکردندان.

مەریوان مەلا حەسەن، گوتەبێژی وەزارەتی ئاوەدانکردنەوە و نیشتەجێکردنی حکوومەتی هەرێمی کوردستان ڕاگەیاند: "ئەو یەکە نیشتەجێبوونانە لە شار و شارۆچکەکانی ھەرێمی کوردستان لەلایەن وەزارەتی ئاوەدانکردنەوەوە دروست دەکرێن کە ھەندێکیان لە قۆناغی تەواوبوون و ھەندێکیشیان بەشێکی زۆری کارەکانیان بۆ کراوە".

گوتیشی: "بەھۆی ئەو بارودۆخەی دوایی و پەتای کۆرۆنا و قەیرانی داراییەوە کە ھەرێمی کوردستانی گرتەوە، بە شێوەی کاتی کارکردن لەو یەکە نیشتەجێبوونانە وەستاوە و دوای ئاساییبوونەوەی حاڵەتەکان، دەست دەکرێتەوە بە کارکردن تێیاندا و تەواو دەکرێن".

گوتەبێژی وەزارەتی ئاوەدانکردنەوە و نیشتەجێکردن باسی لەوەش کرد دوای تەواوبوونیان، بەپێی چەند مەرج و ڕێنوێنییەک، یەکە نیشتەجێبووەکان بەسەر کەسانی کرێنشین و کەمدەرامەتدا دابەش دەکرێن.








باسنيوز