ل سنورێ قه‌زا ئاكرێ یا سه‌ر ب پارێزگه‌ها دهۆكێ ڤه‌، تا نۆكه‌ 44 كه‌س تووشى ڤایرۆسێ كۆرۆنایێ بوونه‌ و ساخله‌میا ئاكرێ دۆپاتیێ ل وێ چه‌ندێ دكه‌ت كۆ ئه‌و پێشبینى بۆ تووشبۆیێن زێده‌تر دكه‌ن.

سه‌باح زوهێر زێبارى، په‌یڤدارێ رێڤه‌به‌ریا ساخله‌میا قه‌زا ئاكرێ دیاركر: "ل ده‌ستپێكا هاتنا ڤایرۆسێ كۆرۆنایێ ل هه‌رێما كۆردستانێ تا نۆكه‌، 44 كه‌س ل سه‌رانسه‌رى قه‌زا ئاكرێ تووشى ڤایرۆسێ كۆرۆنایێ بوونه‌ و ژ وان 6 كه‌س ب ته‌مامى چاره‌سه‌ر بوونه‌ و قه‌ستا ناڤا مال و خێزانێن خۆ كرینه‌ و د هه‌مان ده‌م دا 38 كه‌س ل نه‌خۆشخانێن تایبه‌ت یێن كۆرۆنایێ دا مانه‌ ل دهۆكێ و چاره‌سه‌ریان وه‌دگرن".

په‌یڤدارێ رێڤه‌به‌ریا ساخله‌میا قه‌زا ئاكرێ ئاماژه‌ ب وێ چه‌ندێ دا: "ئه‌ڤ تووشبوویێن ئاكرێ رێژا هه‌ره‌ زۆر یا ڤان كه‌سان ئه‌ون یێن كۆ ل به‌غدا ده‌وامێن فه‌رمى ئه‌نجام دده‌ن و ده‌ما قه‌ستا پارێزگه‌ها دهۆكێ دكه‌ن ل خال و زالگه‌هان پشكنین بۆ دهێنه‌ ئه‌نجام دان و گۆت ژى: ژ به‌ر كۆ قه‌زا ئاكرێ ئێكه‌م باژێركه‌ ده‌ما كه‌سه‌ك ل هه‌ولێرێ ده‌ربازى دهۆكێ دبیت، دگه‌هیته‌ ئاخا ئه‌ڤى باژێركى، له‌ورا هه‌رده‌م مه‌ترسى ل سه‌ر ئه‌ڤى باژێركى هه‌یه‌".

ئاماژه‌ ب وێ چه‌ندێ ژى دا: "ئه‌ڤ تووشبوویێن كۆرۆنایێ ئه‌وێن ل به‌غدا دهێنه‌ ئاكرێ، ب چ ره‌نگه‌كێ ئه‌و ناچنه‌ ناڤا خێزانێن خۆ دا و تێكهه‌لیا كه‌س و كاران ئه‌نجام ناده‌ن و ل زالگه‌هان پشكنینێن كۆرۆنایێ بۆ دهێنه‌ ئه‌نجام دان، تا كۆ پشكین ده‌ردكه‌ڤن و ئه‌نجام دیار دبیت، ئه‌گه‌ر ساخله‌م بن ل وى ده‌مى قه‌ستا مالێن خۆ دكه‌ن و ئه‌م پێشبینى بۆ تووشبوویێن زێده‌تر دكه‌ین و هیڤیخوازین هه‌مو نه‌خۆش زووترین ده‌م چاره‌سه‌ر ببن و قه‌ستا ناڤا مال و خێزانێن خۆ بكه‌ن".












باسنیوز