گوتەبێژی وەزارەتی تەندروستیی حکوومەتی ھەرێمی کوردستان، ڕای گەیاند بانگەشەکردن بۆ بەکارھێنانی دەرمانی گیایی بۆ چارەسەرکردنی پەتای کۆرۆنا بنەمای زانستی نییە، ھاوکات بڕیاریشە ڕێکخراوی تەندروستیی جیھانی لە ماوەیەکی نزیکدا چەند پێداویستییەکی چارەسەری پەتای کۆرۆنا بنێرێتە ھەرێمی کوردستان.

د. محەمەد قادر، گوتەبێژی وەزارەتی تەندروستیی حکوومەتی ھەرێمی کوردستان ڕاگەیاند: "ڕێکخراوی تەندروستی جیھانی (WHO) بڕیاری دابینکردنی کۆمەڵێک کەلوپەلی خۆپارێزی و پێداویستیی پشکنین و ژمارەیەک ئامێری ئۆکسجینی پێداوین و بڕیارە دوای تەواوبوونی ڕێککارەکان لە چەند ڕۆژی داھاتوودا ئەو پێداویستییانە بگەنە ھەرێمی کوردستان".

لەبارەی بەکارھێنانی ھەندێ دەرمانی گیایی کە لەلایەن چەند کەسێکەوە وەک دەرمانی چارەسەری پەتای کۆرۆنا بەکار دەھێندرێن و بانگەشەیان بۆ دەکرێت، گوتەبێژی وەزارەتی تەندروستی گوتی: "گیادەرمانییەکان لەڕووی پزیشکی و تەندروستی بۆ چارەسەری پەتای کۆرۆنا ھیچ بنەمایەکی زانستییان نییە و مامەڵەکردن پێیانەوە قەدەغەیە و داواش لە ھاووڵاتییان دەکەین بۆ ئەو مەبەستە بەکاریان نەھێنن".





باسنیوز