قایمقامێ‌ قەزا شنگال دیاركركو نۆكە رێك ب خەلكێ‌ شنگال ناهێتە دان بچنە چیایێ‌ شنگال. هیچ كەسەك نەشێت بێ‌ دەستۆریا گرۆپێن چەكدار بەرەڤ چیایێ‌ شنگال بچیت.

مەحما خەلیل، قایمقامێ‌ قەزا شنگال دیار كر كو: "گرۆپێن چەكدار رێ‌ ب خەلكێ‌ شنگال نادەن بچنە چیایێ‌ شنگال. هەتا بۆ خۆدانكرنا ئاژەلی ژی خەلك نەشێن بچنە چیای.‌ ئەو كەسێن كارێن نێچیرێ ژی دكەن نەشێن بچنە نێچێرێ بكەن. ژبەر گرۆپێن چەكدار هەر كەسەكێ‌ بچتە چیایێ‌ شنگال پێدڤیە ب رێیا گرۆپێن چەكدار بیت. ئەو رێ‌ نادەن بێ‌ وان تشتەك ل چیایێ‌ شنگال بهێتە كرن".

خۆیا ژی كر كو: "خەلكێ‌ شنگال گەلەك نەخۆشی دیتن پێدڤیە گرۆپێن چەكدار ژی شنگال چۆل بكەن داكو جارەكا دی‌ تەناهی‌ و ئاڤەدانی ل شنگال دروست بیت و خەلك تووشی ئاریشەیان نەبن".

ئاشكەرا كر كو: "گەلەك جاران مە داخاز كریە هەموو گرۆپێن چەكدار شنگال چۆل بكەن. مخابن هەتا نۆكە ماینە ل شنگال ئەڤە بوویە مەزنترین ئاستەنگ هەمبەر تەناهیێ‌ و ئاڤەدانیا شنگال".

سالا 2014ێ‌ تیرۆرستێن داعش هێرشی سەر شنگال كرن دئەنجامدا ژی 360 هزار كەسێن ئێزدی ئاوارە بوون و پتر حەفت هزار كەسان ژی هاتنە گرتن و رەڤاندن ژلایێ‌ تیرۆرستێن داعش ڤە. هەتا نۆكە ژی چارەنڤیسێ‌ گەلەك ژی دیار نینە و هێشتا ژی پتریا خەلكێ‌ شنگال ئاوارەنە.











باسنیوز