قایمقامێ شێخان: حەشدا شەعبی خەلك ب نە یاسایی رەوانەی شێخان دكەت
سەردار یەحیا، قایمقامێ قەزا شێخان داخۆیانیەكێ دا دیار كر: "ژ دەستپێكا هاتنا شەپۆلا ڤایرۆسێ كۆرۆنایێ و دەركرنا بەیاننامێن وەزارەتا ناڤخۆ یا حكۆمەتا هەرێما كوردستانێ هەر ژ بەیانناما ژمارە ئێك تا دۆماهی بەیاننامە كۆ گرتنا دەرگەهێن سنۆری بوویە دگەل پارێزگەهێن دیتر یێن عیراقێ ب تایبەتی دناڤبەرا هەردوو پارێزگەهێن دهۆك و مووسل، گەلەك كەس هەبوونە هەولا وێ چەندێ داینە ب رێكێن نەیاسایی(قاچاخ) ژ مووسل بهێنە ناڤا ئاخا هەرێما كوردستانێ ب تایبەتی پارێزگەها دهۆكێ، لێ ب خوشحالی ڤە لێژنە و هێزێن ئێمناهیێ رولەكێ باش بۆ رووبروو بوونا ئەڤێ دیاردێ گرتیە بەر و هژمارەكا كەسان ژی هاتنە دەستەسەركرن".
قایمقامێ قەزا شێخان ئەو چەندە ژی دیار كر: "ب دلگرانی ڤە، هێزێن عیراقێ بۆ رووبروو بوونا ئەڤێ دیاردێ د هاریكار نەبوونە" و گۆت ژی: حەشدا شەعبی هەولددەت و هاریكارە بۆ وێ چەندێ خەلك ب رێكێن نە یاسایی ژ مووسل بهێتە ناڤا ئاخا قەزا شێخان دا و بۆ دهۆكێ بچن، لەورا ژلایێ هێزێن ئێمناهیا قەزا شێخان ڤە تا نۆكە شیانە 40 كەسان دەستگیر بكەن كۆ ب رێكێن نە یاسایی هاتینە ناڤا قەزا شێخان و ئەو 40 كەسە بۆ بنگەهێن كەرەنتینكرنێ هاتنە ڤەگۆهاستن و پشتی دەمێ وان یێ كەرەنتیكرنێ دۆماهی دهێت دێ بۆ دادگەهێ هێنە رەوانەكرن تا كۆ بگەهنە سزایێ یاسایی".
ناڤبری تەكەز ل سەر وێ چەندێ ژی كر: "تا نۆكە 6 كەس ل سنورێ قەزا شێخان تووشی ڤایرۆسێ كۆرۆنایێ بوونە كۆ 2 ژ وان خەلكێ پارێزگەها مووسل بووینە و 4 كەسێن دیتر خەلكێ شێخانن و رەوشا وان یا جێگیرە و ل نەخۆشخانا تایبەت ب كۆرۆنایێ ڤە ل دهۆكێ چارەسەریێ وەردگرن و دێ بەردەوام بین ل سەر ئەركێ خۆ و ناهێلین چو كەس ب رێكێن نە یاسایی بهێت ناڤا ئاخا پارێزگەها دهۆكێ دا".
باسنيوز
