بەڕێوەبەرى چاکسازیى ژنان و مداڵانى هەولێر رای گەیاند راگیراوێک کە ئەمڕۆ ئازاد کرا، ماوەى هەفتەیەکە تووشى کۆڕۆنا بووە، بەڵام هیچ کەسێکى دیکە لە راگیراوە سزادراوان، یان کارمەندانى چاکسازییەکە تووشى کۆرۆنا نەبوون.

لەمبارەوە تەیب عەبدولعەزیز بەڕێوەبەرى چاکسازیى ژنان و نەوجەوانانى پارێزگاى هەولێر راى گەیاند: "تەنیا ئافرەتێکى راگیراو لە چاکسازیى ژنان و نەوجەوانانى هەولێر تووشى پەتا کۆرۆنا بووە، کە ماوەیەکە لایان راگیراوە، بەڵام ئەمڕۆ بە بڕیارى دادوەرى لێکۆڵینەوە دۆسیەکەى داخرا و ئازاد کرا، بەهۆى ئەوەى دۆسیەکەى یەکلا بووەوە، نەک لەبەر تووشبوونى بە پەتاى کۆرۆنا".

راشی گەیاند: "ئەو کەسە لەو ماوەیەى کە لاى ئێمە راگیرابوو بۆ پشکنین و چەند رێککارێکى دیکەى دادگایى چەندین جار سەردانى نەخۆشخانە و چەند شوێنێکى دیکەى کردووە، رەنگە لە ئەنجامى بەرکەوتنى بە کەسانى دەرەوە تووشى پەتاکە بووبێت".

روونیشى کردەوە: "پشکنین بۆ تەواوى کارمەندانى چاکسازیى ژنان و نەوجەوانانى هەولێر کراوە، پشکنینەکان نێگەتیڤ دەرچوون و هیچ کەسێک تووشى پەتاکە نەبووە، سەبارەت بە راگیراو و سزادراوانیش بە هەمان شێوە هیچ کەسێک تووشى کۆرۆنا نەبووە".











باسنیوز