ئەندامێكی پەرلەمانی كوردستان رای گەیاند دژەكانی چاكسازی دەیانەوێت پرسی کەمکردنەوەی بودجەی وەزارەتەکان كە رێكارێكی كاتییە، ببەستنەوە بە پرسی چاكسازیی و وا لە خەڵك بگەیەنن چاكسازی دژی مووچەی ئەوانە، بەڵام بەم جۆرە نییە.

ئەرشەد لۆلانی، ئەندامی لێژنەی دارایی لە پەرلەمانی كوردستان رایگەیاند: "ئەو كەمكردنەوەیەی بودجەی وەزارەتەکان كە لەلایەن حكوومەتەوە بڕیاری لێ دراوە، پەیوەندیی بە یاسای چاكسازییەوە نییە، بەڵكوو تەنها بابەتێكی كاتتیە و بۆ یەك مانگە و بەهۆی كورتهێنانی پارەی مووچەیە".

ئەو پەرلەمانتارە گوتیشی: "یاسای چاكسازی لە سەرەتای مانگی حەوتەوە بە كرداری دەچێتە بواری جێبەجێكردنەوە، خەڵكانێك بەرژەوەندییان لە چاكسازی نییە و كارەكانیان هەمووی گەندەڵییە، دەیانەوێت وێنەكە ناشیرن پیشان بدەن، بۆیە بەو كەسانە دەڵێن یاسای چاكسازی بەرەو جێبەجێكردنە و پەشیمانبوونەوەی بۆ نییە، بۆیە دژەكانی چاكسازی دەیانەوێت پرسی کەمکردنەوەی بودجەی وەزارەتەکان كە رێكارێكی كاتییە، ببەستنەوە بە پرسی چاكسازی و وا لە خەڵك بگەیەنن چاكسازی دژی مووچەی ئەوانە".

ئەرشەد لۆلانی ڕاشی گەیاند: "فەرمانبەران دڵنیا دەكەینەوە چاكسازی لە بەرژەوەند ئەوانە و یاسای چاكسازی بۆ نەهێشتنی گەنەدەڵی و كەمكردنەوەی بندیوار و زیادكردنی دادپەروەرییە، بۆیە داوا لە فەرمانبەران دەكەم بە موزایەدە هەڵنەخەڵەتێن، خەڵكانێك دەیانەوێت بۆ بەرژوەندیی تایبەتیی خۆیان چاكسازی نەكرێت، بۆیە با فەرمانبەران دڵنیا بن چاكسازی لە قازانجی ئەوانە و سوودی بۆ هەموو خەڵكی هەرێمی كوردستان دەبێت".

لۆلانی جەختیشی كردەوە: "ئەوان لە پەرلەمانی كوردستان چاودێری جێبەجێكردنی یاسای چاكسازی دەكەن و ئەو پەیڕەوەی بۆ جێبەجێكردنی یاسای چاكسازی دەركراوە ئێمە ئاگاداری بووین، لە مانگی داهاتووشدا یاساكە كە دەچێتە بواری جێبەجێكردنەوە و ئێمە چاودێریی قۆناغەكانی جێبەجێكردنی دەكەین".












باسنیوز